ئىنتىزارلىق (شېئىر)
ئابدۇخالىق ئۇيغۇر
بېشىڭنى ئېلىپ كەتتىڭ،
بىرمۇ كەلمىدىڭ ئەي يار.
خېتىڭ يوق، خەۋىرىڭمۇ يوق،
دىققەت، ھەيرىتىم ئارتار.
مىڭ مەرتەم سېنى ئويلاپ.
يوللاردا سېنى سوراپ،
ئۆيگە قايتىمەن ناچار.
ئوتى ئۆتۈپ تۇتاشتى.
دەردى ھەددىدىن ئاشتى،
ئەھۋالىم يامان دىشۋار.
مۇنتەزىر بولۇپ تالدى.
يارىم شۇنداق ئوت سالدى،
چىقتى پەلەكتە شەرار.
يېنىپ كەلمىدى بېرىپ.
يۈرەك – باغرىمنى يېرىپ،
ئازاب قىلادۇر بىسيار.
يار كۆرسەتۇرمۇ دەپ بوي.
بولدى ماڭا ئۇلۇغ كوي،
دەپ يارىم قاچان قايتار.
ئۇيقۇ كەلمەيدۇ ياتسام.
شۇنداق دەردىڭنى تارتسام،
ئەجەب بولمىدىڭ غەمخار.
ئىشىكىڭدىن سورارمەن.
بەك ئاۋارە يۈرەرمەن،
كۆرسەت يۈزۈڭنى ئاشكار.
كىرمەككە ئىلاجىم كەم.
ئاچمامسەن بابۇ كەرەم،
جانغا بەرمىگىل ئازار.
پىنھان قىلىپ ئۆزۈڭنى؟
ئاڭلاتمامسەن سۆزۈڭنى،
ئەيلەپ ئوتقا گىرىپتار ؟
بىرمۇ ئاڭلىماس ئۇل يار.
بولدۇم كويۇڭدا خۇمار،
كىمگە قىلارمەن ئىزھار .
Yorumlar
Yorum Gönder