شېئىرنىڭ ئېنىقلىمىسى (شېئىر)
پاستېرناك
بۇ شادلىق قايغۇنىڭ غالجىر شاۋقۇنى،
بېسىلغان مۇزلۇقتىن ياڭرىغان ناخشا.
بۇ ياپراق توڭلىغان قىشنىڭ سوغ تۈنى،
بۇ ئىككى بۇلبۇلنىڭ بەس كۈيى راسا.
بۇ تاقىر قاغجىراق پۇرچاق دالىسى،
بۇ دۇنيا كۆزىدە مۆلدۈرلىگەن ياش.
فىگارو نېيىنىڭ مۇڭلۇق نالىسى
مۆلدۈردەك كۈي تۆككەن يۈرەككە تۇتاش.
بۇ، ئۈزۈش كۆلىنىڭ تەكتىدىن تۈندە،
ئىزدەلگەن ۋە لېكىن چىقمىغان نەرسە.
تۈن تىترەك قولىدا ئوچۇملاپ تورغا،
كىرگۈزسەم دېگەن شۇ يۇلتۇز ھەدېسە.
سۇدىكى تاختايدىن يېقىمسىز دېمىق،
تىترەكتەك ئۆرۈلۈپ چۈشەرمۇ ئاسمان؟
يۇلتۇزلار قارىشىپ كۈيلەر بى تىيىق،
ۋە لېكىن كائىنات قاقاس بىر ماكان.
ئوسمانجان ساۋۇت تەرجىمىسى
Yorumlar
Yorum Gönder