رۇبائىيلار (ئابدۇللاھ سۇلايمان)

1

بىر كۈنى دىلىم غەش، ئىچكەنتىم شاراپ،

كەيپ بولدۇم، مەي - مەسلىك تېنىمگە تاراپ.

چىقتى جام تېگىدىن بوۋامنىڭ ئۈنى:

"ئەقلىڭدىن خوشلاشما مۇنچە ئالدىراپ!"

 

2

ماڭلايدىن تۆكۈپ ھەر كىم ساپ ئەجرى تەر،

باغ بىنا قىلسا، شۇلا ھەقىقى ئەر.

ئەر ئېلىپ نۆۋەت، سالسا بىر تال ئۇرۇق،

يەر ئېلىپ ئاندىن نۆۋەت، بېرىدۇ زەر.

 

3

بىر ھېسابتا ئىنسان ئوخشار لەگلەككە،

گايىدا خىيالى ئۇچار پەلەككە.

بىھۇدە خىيالنىڭ يىپىنى تارتقىن،

ئۇچىنى چىڭ باغلاپ ئۇلۇغ تىلەككە.