رۇبائىيلار (ئابلىز ھوشۇر)

 

1

شاھلىقتىن يوق ئەسلا تامايىم مېنىڭ،

ئېلىم، سېنىڭ رايىڭ ھەم رايىم مېنىڭ.

سەن بەخت دېسەڭ بۇ - بەختىم غۇرۇرۇم،

گەر گۇناھ دېسەڭ شۇ گۇناھىم مېنىڭ.

 

2

مەيلى سەن نۆۋىتى بەزمىدە ئولتۇر،

نۆۋىتى ئەمەل كۈت خەزىنىدە ئولتۇر.

تۇپراققا كىرگىچە جىسمىڭ، ئەل ئۈچۈن

ئۆمرۈڭنىڭ جامىنى شەرۋەتكە تولدۇر.

 

3

دىلىڭدا بارىنى تىلىڭغا دېگىز،

قېتىقنى قايماق دەپ ماختىما ھەرگىز.

كومزىكىڭ چېقىلسا سېرىڭ ئاشكارا،

بەرىبىر قاپ ئىچىدە ياتمايدۇ بىگىز.