كۈنىگە بىر ئەقىل (تولستوي)

كۈنىگە بىر ئەقىل

كىرىش سۆز

لېۋ تولستوي

 

   «كۈنىگە بىر ئەقىل» ناملىق بۇ كىتابىم مېنىڭ بۇرۇنقى «دەۋرى ئوقۇشلۇق» ناملىق كىتابىم بىلەن ئۇسلۇب جەھەتتىن ئوخشاپ كېتىدۇ، قۇرۇلمىسىمۇ ئۇنىڭغا يېقىن كېلىدۇ. ئۇنىڭغا، بىر يىل ئىچىدىكى ھەر بىر كۈن ئۈچۈن نەقىل-ئۈزۈندىلەر توپلانغان.
   ئۇشبۇ كىتاب بىلەن بۇرۇنقى كىتابىمنىڭ پەرقى، ئاساسلىقى كىتابتىكى يېڭى نەقىل-ئۈزۈندىلەرنىڭ ئالدىنقى كىتابىمدىكىدەك ئىختىيارىي تىزىلماستىن، بەلكى لوگىكىلىق تەرتىپكە ئاساسەن تىزىلغانلىقىدا. بۇ ئايدىن كېيىنكى ئايغىچە ھەر كۈنلۈك نەقىل-ئۈزۈندىلەر ئالاھىدە تەرتىپكە ئىگە بولۇپ، كېيىنكى بىر پارچە بىلەن ئالدىنقى بىر پارچە ئۆز ئارا مۇناسىۋەتلىك، شۇڭا، ھەر قايسى كۈنلەر ئۆز ئارا مۇناسىۋەتلىكتۇر. شۇنىڭغا ئوخشاشلا، ھەر قايسى ئايلار بىزنىڭ ئىش-ئەمەللىرىمىزگە يول كۆرسىتىپ بېرىدىغان ئۆزگىچە پەلسەپىۋى تېمىلارغا ئىگە. ھەر بىر تېمىلاردا قەدىمدىن ھازىرغىچە بولغان ھەرقايسى ئەل مۇتەپەككۇرلىرىنىڭ نەقىل-ئۈزۈندىلىرى شەرھلەنگەن.
   كىتابتا مۇتەپەككۇرلارنىڭ ئىسىملىرى كۆرسىتىلگەن (مەن ئۇلارنىڭ ئىدىيىسىدىن پايدىلانغان) بولسىمۇ، كۆپىنچە نەقىل-ئۈزۈندىلەر ئاز-تولا ئۆزگەرتىلدى ياكى قىسقارتىلىپ ئىخچاملاشتۇرۇلدى، شۇڭا، مەن ئۇ نەقىل-ئۈزۈندىلەرگە نىسبەتەن چۈشەنچەمنى ئەكس ئەتتۈردۈم. ئاپتورى تىلغا ئېلىنمىغان نەقىل-ئۈزۈندىلەر بولسا مەن ئۆزۈم يازغانلىرىدۇر.
   ئۇشبۇ كىتابىمنىڭ ئوقۇرمەنى مېھرىبانلىق ۋە بەر كاماللىق تۇيغۇسىنى مەندەكلا چوڭقۇر ھېس قىلىپ يېتىشىنى ئارزۇ قىلىمەن. بۇ كىتابنى يېزىۋاتقىنىمدا، مەن شۇنداق تۇيغۇلارنى چۆمۈلگەن؛ ھەر كۈنى بۇ كىتابنى ئوقۇغىنىمدا، مەن ئەنە شۇنداق تۇيغۇلارغا قايتا-قايتىلاپ چۆمۈلىمەن.

1908-1910-يىللار.

كۈنىگە بىر ئەقىل (باھارنامە) 1-ئاي

ئېتىقاد

   خۇدانىڭ قانۇنىيىتى خۇدانىڭ ئىرادىسىنى ئەمەلگە ئاشۇرۇش. ھەممە ئىنسان تۇغۇلغاندىلا باب-باراۋەر، شۇڭا خۇدانىڭ قانۇنىيىتى بىزنىڭ ھەممىمىزگە ئۈچۈن ئوخشاش. بىز خۇدانىڭ قانۇنىيىتىنى چۈشىنىپ يەتكەن ھەم ئاڭا ھۆرمەت قىلغان چېغىمىزدىلا ئاندىن بىزگە ياخشى تۇرمۇش نېسىپ بولىدۇ.
يەھۇدىيلارنىڭ ئاتا-بوۋىسىدىن قالغان مۇنداق تەمسىلى بار: «خۇدانىڭ چىرىقى ئادەمنىڭ روھىدۇر.» خۇدانىڭ چىرىقى يانمىسا، كىشى بەكمۇ يار-يۆلەكسىز قالىدۇ؛ خۇدانىڭ چىرىقى يانسا، كىشى تېخىمۇ قۇدرەت تېپىپ ھۆر-ئازاد بولىدۇ. بۇ سۆزنى ئاستۈن-ئۈستۈن قىلىپ قويۇشقا بولمايدۇ، چۈنكى، ئۇ ئادەمنىڭ ئۆز قۇدرىتى بولماستىن، بەلكى تەڭرىنىڭ قۇدرىتىدۇر.
بىز نىچۈك مېھرىبان، بۇنى بىلمىسەكمۇ ئۆزىمىزنىڭ ئالىيجانابلىق قانۇنىيىتىنى ھۈرمەتلىشىمىز كېرەكلىكىنى بىلىمىز، مېھرىبانلىق-ئالىيجانابلىق كىشىلەرنىڭ پسىخىكىسىدا ۋە بىزنىڭ قەلبىمىزدە مەۋجۇت.
مۇبادا، بىز ئۇنى رەسىم-قائىدە ۋە تىلاۋەت دەپ بىلىپ ئەمەلىيىتىمىز بىلەن كۆرسەتمىسەك، خۇدانىڭ كۆڭلىنى ئالساقمۇ خۇدا ھەمدە ئۆزىمىزنى ئالدىغان بولۇپ قالىمىز.

1-ئاينىڭ 1-كۈنى


روھ

«ئىچىمدىكى ئۆزۈم»نى قانداق ئاتاي؟ ئۇ مېنىڭ روھىم، ئۇنىڭ تۇرارگاھى قەلبىمدۇر، ئۇندا ۋۇجۇد-تېنىم بىلەن باغلىنىپ تۇرىدۇ. بىز كۈنسېرى قېرىيمىز، ھاياتنىڭ ھەرقايسى باسقۇچلىرىنى بېسىپ ئۆتىمىز. بىز ئەڭ دەسلەپ مەسۈم بوۋاق ئىدۇق، ئاندىن بالىلىققا قەدەم قويدۇق، ئاندىن يەنە يىگىت-قىز بولدۇق، ئەڭ ئاخىرى ئاستا-ئاستا قېرىۋاتىمىز. بۇ باسقۇچلارنى بېسىپ ئۆتكەن بولساقمۇ، قەلبىمىزدىكى ئۆزىمىز يەنىلا دەسلەپكى پېتىچە تۇرماقتا. قەلبىمىزدىكى ئۆزىمىز دەل بىزنىڭ روھىمىزدۇر.
ئۆزىنى چۈشىنىشتە، ھاياتنىڭ تەندە ئەمەس، روھتا ئىكەنلىكىنى بىلگۈلۈك.
تۆمۈر تاشتىن، تاش ياغاچتىن، ياغاچ سۇدىن، سۇ ھاۋادىن قاتتىق. بىراق، بىر خىل نەرسە باركى، بىز ئۇنى تۇتۇپ كۆرەلمەيمىز، ئاڭلىيالمايمىز، ئۇ ھەرقانداق نەرسىدىن قۇدرەتلىك بولغان بولسىمۇ. ئۇ بۇرۇنلا مەۋجۇت ئىدى، شۇدەممۇ مەۋجۇت، كەلگۈسىدىمۇ مەۋجۇت، مەڭگۈ يوقالماستۇر. ئۇ زادى نېمە؟ ئۇ، روھ، ھەر بىرىمىزنىڭ قەلبىنى ماكان تۇتقان روھ.
بەھەيۋەت تاغلار، قۇياش ۋە كائىناتتىكى يۇلتۇزلارنىڭ يوغانلىقى بىزنى ھەيرەتتە قالدۇرسىمۇ بۇ غايەت زور مەۋجۇداتلار بىزنىڭ روھىمىزنىڭ قۇدرىتى، سىرلىقلىقى ئالدىدا ھېچنەرسە ئەمەس. دۇنيادا ئەڭ قۇدرەتلىك، ئەڭ سىرلىق، مەڭگۈلۈك ھەيرەتتە قالدۇرىدىغىنى، پەقەت ئۆزىمىزگە تەۋە بولغىنى، يېڭىلمەس بولغىنى بىزنىڭ روھىمىز.

1-ئاينىڭ 2-كۈنى

 


بارلىق جانلىقلارنىڭ روھى بىر

دەريا-ئېقىنلار كۆلچەككە، كۆلچەك سوغىغا، سوغا قەدەھكە ئوخشىمىسمۇ، ئۇنىڭدىكى سۇنىڭ ھەممىسى ئوخشاش. خۇددى شۇنىڭدەك، ساغلام چوڭلار، كېسەلچان بالىلار، قىران شاھ، يوقسۇل ئاياللار−ھەر خىل كىشىلەرنىڭ روھىمۇ ئوخشاش. ئوخشاش بىر روھ ھاياتلىقنى ھەر بىرىمىزگە ئاتا قىلغان.
باشقىلار بىلەن بىزنىڭ ئوخشاش روھىمىزغا قاراپ، بىز ئېغىر ئۇيقىدىن ئويغاندەك بولىمىز.
بىز باشقا بارچە ئادەملەر، كۈللى جانلىقلار بىلەن تامامەن ئوخشاشمىز. شۇڭا، بىز ئۆز ئارزۇ-ئىستەكلىرىمىزنى باشقىلاردىنلا ئەمەس، ھەيۋناتلاردىنمۇ قاندۇرالايمىز.
تەڭرى ھەر بىرىمىزنىڭ قەلبىدە.
ئادەم يەككە-يىگانە ياشىيالمايدۇ، ئادەمنىڭ ھاياتى ۋە روھى باشقىلار بىلەن باغلانغان. ئەگەر، كىشىلەر بۇنى چۈشۈنىپ يېتەلىسە، باشقىلارغا قىلغان ياخشىلىقى ماھىيەتتە ئۆزىگە قىلىنغان ياخشىلىق ئىكەنلىكىنى تېخىمۇ چوڭقۇر تونىيالايدۇ.

1-ئاينىڭ 3-كۈنى

 

خۇدا

خۇدا سۆيگۈدۇر، ياكى سۆيگۈ خۇدادۇر، دېيىشىدۇ كىشىلەر. خۇدا ئەقىل-پاراسەتتۇر، ياكى ئەقىل-پاراسەتتە خۇدانىڭ قۇدرىتى بار، دېيىشىدۇ ھەم. ئەمما، ئۇنداقمۇ ئەمەس. سۆيگۈ ۋە ئەقىل-پاراسەت بىزگە ئايان بولمىش خۇدانىڭ سۈپەتلىرى. خۇدا زادى نېمە، بىز ئەلۋەتتە بۇنى بىلىپ يېتەلمەيمىز.
ھەر بىر كىشى خۇدانى سېزەلەيدۇ، ئەمما ئۇنى چۈشىنەلەيدىغان ھېچكىم مەۋجۇت ئەمەس. شۇڭا، خۇدانى چۈشىنىشكە ئورۇنۇشنىڭ ھاجىتى يوق، بەلكى خۇدا قەلبىڭىزدە مەۋجۇت ئىكەنلىكىنى سېزىپ تۇرسىڭىزلا كۇپايە. ئەگەر، سىز خۇدانى ئۆز قەلبىڭىزدىن تاپالمىسىڭىز، ئۇنى مەڭگۈ ھېچيەردىن تاپالمايسىز.
ئۆز ئىچىڭىزنى ئۆزىڭىز تەكشۈرگەندە، سىز «ئۆز-ئۆزىڭىز» ياكى ئۆز روھىڭىزنى كۆرەلەيسىز. سىز ئۇنى تۇتۇپ باقالمايسىز، بىر جۈپ كۆزدە كۆرەلمەيسىز، ئۇنى چۈشىنەلمەيسىز، شۇنداقتىمۇ ئۇنىڭ ئىچىڭىزدە مەۋجۇتلۇقىنى بىلەلەيسىز. سىزنىڭ بۇ بۆلىكىڭىز−سىز چۈشىنەلمەيدىغان قىسمىڭىز−دەل كىشىلەر ئېيتىۋاتقان خۇدادۇر. خۇدا بىزنىڭ ئەتراپىمىزدا، ھەم بىزنىڭ قەلبىمىزدە−بىزنىڭ روھىمىزدىدۇر.
سىز ئۆزىڭىزنىڭ خۇدا بىلەن بىللە ئىكەنلىكىڭىزنى قانچىكى چۈشۈنۈپ يەتكەنچە ئۆزىڭىز بىلەن ئۇنىڭ پۈتكۈل پانىي دۇنيادىكى زاھىرەنلىكىنىڭ بىردەكلىكىنى بىلىپ يېتەلەيسىز.

1-ئاينىڭ 4-كۈنى

 

روھنىڭ بىردەكلىكى

بىراۋ، سوقراتتىن نەدە تۇغۇلغانلىقىنى سورىغانىكەن، ئۇ: «مۇشۇ يەر شارىدا تۇغۇلغان» دەپ جاۋاب بېرىپتۇ. ئۇنىڭدىن يەنە قايسى ئەلنىڭ پۇقراسى ئىكەنلىكىنى سورىغاندا، ئۇ: «مەن دۇنيانىڭ پۇقراسى» دېگەنىكەن جاۋابەن. بىز بۇ چوڭقۇر ھىكمەتكە تۇيۇنغان سۆزلەرنى ئەستە چىڭ تۇتۇشىمىز كېرەك. بىز ئوخشاش بىر يەر شارىدا ياشايمىز، خۇدانىڭ ئۇلۇغ كۈچ-قۇدرىتى (ئۇ، ئادەمنىڭ كۈچ-قۇدرىتىدىن يۇقىرىدۇر) ۋە خۇدانىڭ قانۇنى ئاستىدا ياشايمىز.
قەلبىمىزگە شۇنىسى ئايانكى، بارچە ئادەملەر ماسلىشىشى، بىردەكلىككە ئىنتىلىشى كېرەك. بىز قانچىكى ئۆم-ئىجىل بولغانچە ھاياتىمىز شۇنچىكى ياخشىلىنىدۇ. شۇنىڭدەك، بىز قانچىكى چېچىلىپ كەتسەك، بىزنىڭ ھاياتىمىز شۇنچە خارابلىشىدۇ. ئادەمنى تەن ۋە روھتىن ئىبارەت ئىككىلا نەرسە ئىدارە قىلىدۇ، تەن ئىدارە قىلغىنىدا، باشقىلار بىلەن كۈرەش-ئۇرۇش قىلىدۇ، ھەمدە باشقىلاردىن يىرگىنىدۇ. ئەمما، ئادەمنىڭ مەنىۋى ئىدرىكى قانچە تەرەققىي قىلغانچە روھقا يەتكۈزۈپ بېرىدىغان ئىچكىي كۈچ-قۇدرەت شۇنچە كۆپ بولىدۇ−يەتكۈزۈپ بېرلگەن مەنىۋى ئىچكىي كۈچ-قۇدرەت قانچە كۆپ بولغانچە روھ باشقىلارنىڭ روھىي بىردەكلىكىگە ئېرىشىشنى شۇنچە ئىستەيدۇ.

1-ئاينىڭ 5-كۈنى

 

سۆيگۈ-مۇھەببەت

ئادەملەرنىڭ ھەممىسى ئۆزىنى سۆيىدۇ، بۇنىڭ قىلچە خاتاسى يوق. بىراق، تەننىلا سۆيۈش، باشقىلارغا ئازاب ئەپكېلىدۇ.
سىز ئۆزىڭىزنىڭ سۆيگۈسىگە ئايلىنالايسىز. پانىي دۇنيا نېمەتلىرىنى سۆيسىڭىز، ئادەتتىكى ئادەم بولۇپ قالىسىز. خۇداغا ئىشىق باغلىسىڭىز، خۇدانىڭ ۋىسالىغا يېتەلەيسىز.
باشقا نەرسە پەيدا قىلغان سۆيگۈ، مەلۇم سەۋەب تۈپەيلى پەيدا بولغان مۇھەببەت ھەقىقىي مۇھەببەت ئەمەس. پەقەت چەكسىز سۆيگۈ-مۇھەببەت−غەرەزسىز، شەرتسىز سۆيگۈ-مۇھەببەتلا مەڭگۈلۈك مۇھەببەتتۇر. ئۇ، ئەبەدىي يوقالمايدۇ، ئەكسىچە ۋاقىتنىڭ ئۆتۈشى بىلەن تېخىمۇ مۇستەھكەملىنىپ بارىدۇ.
سۆيگۈ-مۇھەببەت بولمىسا، گۈزەل ئەخلاق-پەزىلەتمۇ بولمايدۇ، ئىزگۈ-ئالىيجانابلىقمۇ بولمايدۇ.

1-ئاينىڭ 6-كۈنى

 

مەغرۇرلۇق

نومۇس قىلىشقا تېگىشلىك نەرسىلەردىن كىشىلەر ھەمىشە ئىناۋەت تاپىدۇ، ئالايلۇق، ئۆزىنىڭ بايلىقى ياكى باشقىلارنى باشقۇرۇش ھوقۇقىدىن.
باشقىلارنىڭ خاراكتېرىنى ھەقىقىي چۈشەنمىگىنىڭىزدىلا، ئۆزىڭىزنىڭ باشقىلاردىن ئۈستۈن تۇرىدىغانلىقىغا ئىشىنىسىز.
سىز ئالىيجانابلىق قىلىۋاتقىنىڭىزدا، بۇنى ئۆز روھىڭىز ئۈچۈن قىلىۋاتامسىز، خۇدالىق ئۈچۈنمۇ ياكى ئۆزىڭىزنىڭ ئىپتىخارلىنىشىڭىز ئۈچۈنمۇ، بۇنى ئېنىق، دەل ئايرىۋالغىلى بولمايدۇ. بىراق، بۇنى ئايرىش ئۇنچىۋالا تەسمۇ ئەمەس، سىز ئۆز-ئۆزىڭىزدىن شۇنداق سوراڭ: مەن قىلغان ياخشىلىق-ئالىيجانابلىقلارنى ھېچكىم بىلمىسە، مەن يەنە قىلىۋېرىشىم كېرەكمۇ؟ سىزنىڭ ياخشىلىق-ئالىيجانابلىقلارنى قىلىشىڭىز نام-ئاتاققا ئېرىشىش ئۈچۈن ئەمەس، بەلكى ئۆز روھىڭىز ئۈچۈن، خۇدالىق ئۈچۈندۇر.
كىشىلەر قىلغانلىرىڭىزنى ئەلبەتتە بەك ياخشى، دەپ ماختىشىدۇ. ئەمما ماختاشقا نائىل بولۇش ئۈچۈنلا قىلىش، خاتادۇر.

1-ئاينىڭ 7-كۈنى

 

شۆھرەتپەرەسلىك ۋە نام-ئاتاق

سىز ھەممىلا كىشىنىڭ سۆيىشى ۋە ئالقىشىغا ئېرىشىپ بولالمايسىز. ئەمىلىيەتتە، ئەگەر سىز ياخشى ئادەم بولغان بولسىڭىز ئەسكىلەر سىزنى مازاقلايدۇ. مۇبادا، سىز ئەسكى بولسىڭىز ياخشىلارنىڭ سىزگە ئىچى پۇشىدۇ. ئەڭ ياخشى ئامال، ياخشىلاردىن بولۇش، باشقىلارنىڭ نېمە دېيىشىگە پەرۋا قىلماسلىق.
نام-ئاتاق ۋە ماددىي بايلىق ئۈچۈنلا ئۆز روھىنى چۆرىۋەتكەن ئادەم، باشقىلارنىڭ قارىشىنى كۆڭلىگە كەلتۈرۈپ ئولتۇرمايدۇ.
ئۆز روھىڭىزنى تاۋلاش ئۈچۈن شان-شۆھرەت ۋە نام-ئاتاققا بېرىلمەڭ.
شان-شۆھرەت ۋەسۋەسىدىن قۇتۇلغاندىلا ئاندىن خۇداغا يېقىنلاشقىلى بولىدۇ.
ھاياتنى ھەقىقەي ياشايدىغان كىشىگە ماختاش-ئۇچۇرۇشلار ۋە نام-ئاتاقلار ھاجەت ئەمەس.

1-ئاينىڭ 8-كۈنى

 

ئاچكۆزلۈك ۋە بايلىق

يوقسۇل-نامراتلار ئارىسىدا ياشاپ تۇرۇپمۇ ئۆزى بايلىققا ئىگە بولۇۋېلىش، بايلىقنى شەرەپ دەپ بىلىش ھەقىقەتسىز تۇرمۇشتۇر.
بىر ئۆمۈر بايلىققا ئېرىشكۈچى مەڭگۈ قانائەت ھاسىل قىلمايدۇ. ئۇلار قانچە بېيىغانسېرى ئارزولايدىغىنى شۇنچە كۆپ بولىدۇ، ئۇلار ئەنە شۇنداق چەكسىز كېتىۋېرىدۇ.
ئېسىڭىزدە بولسۇنكى، تۇرمۇش بىر دەرس. بۇ دەرس سىزگە ئۆز روھىڭىزنى قانداق تەربىيىلەشنى ئۆگىتىدۇ. ئۆز روھىنى تەربىيىلىمەستىن، بەلكى پۈتكۈل ھاياتىنى بايلىق توپلاشقىلا سەرىپ قىلىش، خاتادۇر.
ناھايتى ئېنىقكى، بايلار بايلىقىنى ئۆزلىرىنىڭ ئارتۇقچىلىقى دەپ بىلىشىدۇ ۋە ئۇنىڭدىن كېرىلىپ يۈرۈشىدۇ. يوقسۇل-نامراتلارنىڭ بايلارغا ھۆرمەت قىلىشى، بايلارنىڭ بايلىققا ئىگە بولغانلىقى ئۈچۈندۇر. نېمە ئۈچۈن شۇنداق بولىدۇ؟ چۈنكى، نامراتلار بىلەن بايلار ئوخشاشلا بايلىقنى پۈتۈن كۈچ بىلەن ئېرىشىشكە ئەرزىيدىغان نەرسە دەپ قارىۋالىدۇ.

1-ئاينىڭ 9-كۈنى

 

تەكەببۇرلۇق

بىز ئوخشاش بولمىغان مەنسەپ-مەرتىۋە ئارقىلىق باشقىلارنى چاقىرىمىز، ئالايلۇق، كاتتىلىرى، تەقسىر، ئالىيلىرى، ھەزرەتلىرى دېگەندەك. بىراق، ھەممە ئادەمگە باپ كېلىدىغان چاقىرىش بىرلا: قېرندېشىم. «قېرىنداش» ھەممىمىزنىڭ خۇدا ئالدىدا ئوخشاشلا قېرىنداش ياكى ھەمشىرە ئىكەنلىكىمىزنى ئېسىمىزگە سالىدۇ.
باراۋەرلىكنىڭ ماھىيەتلىك ئىپادىلىنىشىدە، ھېچكىم مەسۈم بالىلارچىلىكمۇ بولالمايدۇ. بالىلار جىمى كىشىگە باراۋەر قارايدۇ، چوڭلار بولسا بالىلارغا پادىشاھ، باي-غوجاملار، داڭلىق زاتلارنى ئىززەتلەپ، نامرات-يوقسۇللار ۋە تىلەمچىلەرنى پەس كۆرشنى ئۆگىتىشىدۇ.
ئۆزىڭىزنى باشقىلاردىن ئۈستۈن ئەمەس، بەلكى باشقىلارنى ئۆزىڭىزدىن ئۈستۈن كۆرسىڭىز، سىزنىڭ باشقىلار بىلەن ئىچ قويۇن، تاش قويۇن بولۇپ كەتمىكىڭىز ئاسانغا چۈشىدۇ.
بالىلار دوستانە شاد-خۇراملىق ئىچىدە ئۆز ئارا بىر-بىرىنى ھۆرمەتلىشىدۇ، قارشى تەرەپنىڭ قايسى تەبىقە، دۆلەت ياكى مىللەت ئىكەنلىكىنى سوراپمۇ ئولتۇرمايدۇ. نېمە ئۈچۈن بىز چوڭلار ئەنە شۇ بالىلارچىلىكمۇ بولالمايمىز؟

1-ئاينىڭ 10-كۈنى

 

سوتلاش ۋە جازالاش

ئىتنى باشقا بىر ئىت چىشلىۋالسا، ئۇمۇ بۇ ئىتنى چىشلەپ-تالايدۇ. ئادەممۇ شۇنداق. بۇ خىل ئىشلارغا دۇچار بولغان ئادەم، ھەقىقەتەن ئالاقزادە بولۇپ كېتىدۇ. بىراق، باشقا بىر خىل ئۇسۇل تېخىمۇ زىيانلىق، ئۇ بولسىمۇ باشقىلارغا ئۈگۈت-نەسىھەت قىلىش: ئادەملىرىمىز جازانى قوبۇل قىلالمايدۇ.
«كۆزىنى ئويغاننىڭ كۆزىنى ئوي، چىشىنى تۆككەننىڭ چىشىنى تۆك، قانغا قان، جانغا جان ئال»−مانا بۇ ئىنسانچە مىزان ئەمەس، بەلكى ھايۋانچە مىزاندۇر.
بىز ئۆزىمىز خاتا قىلغاندا، ئۆزىمىزنى، ئۆزىمىزنىڭ ئىچىدىكى ئۆزىمىزنى، ئۆزىمىزنىڭ روھىنى ئەيىبلىمەيمىز. بىز ھەرھالدا، ئۆز ئىش-ھەرىكىتىمىزنى بولسىمۇ ئەيىبلەيمىز. باشقىلارغىمۇ شۇنداق مۇئامىلە قىلايلى. باشقىلار خاتا قىلغاندا، بىز ئۇنىڭ روھىنى ئەمەس، خاتا قىلغان ئىش-ھەرىكىتىنى ئەيىبلەيلى.
يامانلىققا ياخشىلىق بىلەن جاۋاب قايتۇرۇش، بۇ دۇنيادىكى ياخشىلىقلارنى كۆپەيتىدۇ.

1-ئاينىڭ 11-كۈنى

 

زوراۋانلىق ۋە ئۇرۇش

قورال كۈچى بىلەن باشقىلارنىڭ تۇرمۇشىنى ئۆزگەرتىمەن دېيىش، خاتا.
زوراۋانلىق ئىنسانلار پەيدا قىلغان ئەڭ يامان توسالغۇ، ئۇ كىشىلەرنى پانىي ئالەمدىكى خۇدا ھۇزۇرىغا كىرىشتىن توسۇپ تۇرىدۇ.
ئەگەر، بىز تەھدىت ۋە زورلۇق كۈچكە تايانساق، ئادەمنى ھايۋان ئورنىدا كۆرگەن بولىمىز. بىزگە ئەقىل-ھوش شۇنىڭغا بېرىلگەنمىدى؟ مۇھىمى، قەلبىمىزگە سۆيگۈ نېمە دەپ بېرىلگەن؟
بىراۋ، خرىستوستىن تەڭرى قانۇنىنى سورىغانىكەن، خرىستوس جاۋابەن: «خۇدانى سۆيسەڭ، ھەقەمسايەڭنى سۆي» دەپتۇ. كىشىلەر خۇدادىن ئوخشاشلا سورىغانىكەن، خۇدا: «پىچاقنى ئۆزۈڭگە سال، ئاغرىمىسا خەققە» دەپتۇ جاۋابەن. مانا بۇ خۇدانىڭ مەڭگۈ ئۆزگەرمەس قانۇنى. بۇددا ئەقىدىسىدىمۇ، كۇڭزى تەلىماتىدىمۇ شۇنداق دېيىلگەن. شۇغىنىسى، قانۇن-پەرمان چىقارغۇچىدىن قانۇن نېمىگە چىقىرىلغان دېسىڭىز، سىزگە تولىمۇ ئاددىي بىر جاۋابنى بېرىشىدۇ. ئۇلار: «سەن بىلىشىڭ كېرەك بولغان قانۇن تېخى كۆپ» دەيدۇ.

1-ئاينىڭ 12-كۈنى

 

ساختا ئىلىم

كىشىلەر، بىلگەنلىرى قانچە كۆپەيگەنچە شۇنچە ياخشى ياشىغىلى بولىدۇ، دەپ ئىشىنىشىدۇ. بىراق، كۆپ بىلگەندىن ئاز بولسىمۇ چوڭقۇر بىلگەن تۈزۈك.
سوقرات، دۆتلۈك ئاز بىلگەنلىكتە ئەمەس، بەلكى بىلمەي تۇرۇپ بىلگەن قىياپەتكە كىرىۋېلىشتا، دېگەنىدى.
بىراۋ ئىلىم ئۆگەنسە، ھەمىشە باشقىلارنىڭ ئىدىيىسىنى ئەستە ساقلايدۇ ۋە قايتىلايدۇ−ئۆزى تۆمۈرچى، ياغاچچى ياكى موزدۇز ئالدىدا تۇرغاندا ئۆزىنى ئۈستۈن قويىدۇ. مېنىڭ ھۈنەرۋەن-كاسىپلارغا بولغان ھۆرمىتىم، ئىلىم ئەھلىگە بولغان ھۆرمىتىمدىن ئېشىپ چۈشىدۇ.
كۆپ ساندىكى كىشىلەر، ئۆزلۈكسىز ئېرىشىش ھاياتنى قۇلاي بىلىملەرگە ئىگە قىلىپ، ئىنسان تەبىئىتىنى ياخشىلايدۇ، دەپ ئىشىنىدۇ. بۇ تامامەن خاتا. ئىنسان تەبىئىتىنى ئۆزگەرتىش ئۈچۈن سىزنىڭ چوقۇم ھاياتتىكى ھەقىقىي مۇھىم مەسىلىگە جاۋاب تېپىشىڭىزغا توغرا كېلىدۇ. كىشىلەرنىڭ مۇشۇنداق بەزى ھەقىقەتلەرنى بايقاش ئېھتىماللىقى بولىدۇ.

1-ئاينىڭ 13-كۈنى

 

ھاۋايى-ھەۋەس ۋە شەھۋانىي ھېسسىيات

ئەڭ قىممەتلىك نەرسىڭىز، قەلب ماكانىڭىز. ئەگەر، سىز ئەڭ قىممەتلىك نەرسىڭىزنى جىسمانىي جەھەتتىلا دەپ قارىسىڭىز−ئالايلۇق، يېمەك-ئىچمەك، ئازادە ئۆي، چىرايلىق ئېگىن ھەمدە باشقا خۇشاللىقلار−سىز بۇ نەرسىلەرنى قوغلاشقىنىڭىز ئۈچۈن بارچە كۈچىڭىزنى ئىشقا سالىسىز. ئەمەلىيەتتە، زېھنىڭىز قانچىكى ئۆز تېنىڭىزنى راھەتلەندۈرۈش ئۈچۈن سەرپ قىلىنسا، سىز مەنىۋى تۇرمۇشقا شۇنچىكى روھىي زېھنىڭىزنى بېرەلمەيسىز.
تېنىمىزنىڭ ھاۋايى-ھەۋەسلىرى گويا بىر كىچىك بالا، ئۇ مەڭگۈ قانائەت قىلمايدۇ. سىزنىڭ بېغىشلىغىنىڭىز قانچە كۆپ بولسا، ئۇلارنىڭ تەلەپ قىلىدىغىنىمۇ شۇنچە كۆپ بولىدۇ، ئەنە شۇنداق كېتىۋېرىدۇ، ئۇنىڭ ئاخىرى−چېكى بولمايدۇ.
تەننىڭ ئارزۇ-ھەۋەسلىرىنى قاندۇرۇش، بەدەننى زەئىپلەشتۈرىدۇ. تەننى زىيادە چەكلەشمۇ بەدەننى زەئىپلەشتۈرۋېتىدۇ. بۇنىڭدىن شۇنى كۆرۈۋېلىشقا بولىدۇكى، ھەقىقىي مەركىزىي نۇقتا پەقەت بىرلا بولىدۇ.

1-ئاينىڭ 14-كۈنى

 

ئاچچىقلىنىش ۋە ئۆچمەنلىك

سوغىنىڭ كىچىككىنە يېرىقىدىنمۇ سۇ ئېقىپ كېتىدۇ، خۇددى شۇنىڭدەك، سىز بىرلا ئادەمدىن نەپرەتلەنسىڭىزمۇ ئۆز تۇرمۇشىڭىز مەنىسىز ئۆتىدۇ.
غەزەپ-نەپرىتىڭىز تۇتقاندا، ئاۋۋال ئونغىچە ساناڭ، ئاندىن سۆزگە ئېغىز ئېچىڭ. ئاچچىقىڭىز يەنىلا بېسىلمىسا، ئانداقتا 100 گىچە ساناڭ. ئاچچىق يېنىپ ئۆزىڭىزگە كەلگەندە، شۇ ئەرزىمەس كىچىككىنە ئىشقىمۇ چېچىلىپ يۈرگىنىڭىز ئۈچۈن ھەيران قالىسىز.
ئادەم ئاچچىقىنى يېڭەلىسە بۇ ئۇنىڭ قىلغان ئەڭ قىممەتلىك ئىشى بولۇپ قالىدۇ.
مۇبادا، بىراۋ چىشىڭىزغا تەگسە، سىزمۇ ئىت، كالا، ئاتتەك يا قاچىسىز، ياكى ئۇنىڭغا يانىسىز. بۇ چاغدا، ئادەملەرچە ئىنكاس قايتۇرسىڭىزمۇ بولىدۇ: «بۇ كىشى مېنى خورلىدى، بۇ ئۇنىڭ تاللىشى، بىراق، مېنىڭ تاللىشىم توغرا ئىش كۆرۈش.»

1-ئاينىڭ 15-كۈنى

 

تىرىشچانلىق

مۇھىمى، باشقىلارنىڭ خاھىشى بويىچە ئەمەس، ئۆزىڭىزنىڭ خاھىشى بويىچە ياشاڭ. بىراق، شۇنداق قىلىش ئۈچۈن، سىز ئۆز روھىڭىز ئۈچۈنلا ياشىشىڭىز، بۇنىڭ ئۈچۈن نۇرغۇن تىرىشچانلىق كۆرسىتىشىڭىز كېرەك.
مەيلى كىچىك بالا ياكى چوڭ ئادەم بولسۇن، ھەممىسى ھەقىقەتنىڭ ئىزگۈلۈك مەنبەسى ئىكەنلىكىگە ئىشىنىدۇ. ئەمما، خاتا قاراش ۋە يالغان-ياۋىداق سۆزدىن قۇتۇلۇپ، تىرىشچانلىق كۆرسىتىشىڭىز كېرەك، شۇندىلا ھەقىقەتكە ئېرىشكىلى بولىدۇ.
تىرىشچانلىق كۆرسەتسىڭىز، ئۆزىڭىزنى غەپلەت ئۇيقۇسىدىن ئويغىتالايسىز. خۇددى شۇنىڭدەك، سىز تۇرمۇشتىمۇ تىرىشچانلىق كۆرسىتىپ ئويغىنىشىڭىز، ئۆزىڭىزنىڭ ھايۋانىي ئۆزلۈكىدىن ئۆزىڭىزنىڭ مەنىۋى ئۆزلۈكىگە يۈزلىنىشىڭىز كېرەك.
جۇڭگو ئۆلىماسى لاۋزى، ھېچنېمە ئۈچۈن ياشاش، ھەممىدىن ئەلا ئەخلاقتۇر دېگەنىكەن. بۇ ئېيتىلما قارىماققا تولىمۇ غەلىتە كۆرۈنسىمۇ، بىز بۇ دۇنيادا ئۆتكۈزگەن بارچە جىنايەتلىرىمىزنى ئويلىغىنىمىزدا، ئۇ غەلىتىمۇ تۇيۇلمايدۇ.

1-ئاينىڭ 16-كۈنى

 

ئىدىيە

بىز ھەمىشە، باشقىلار بىلەن تونۇشقاندىلا ئىشلىرىمىز ئالغا باسىدۇ، دەپ ئىشىنىمىز. بۇ ئوي خاتادۇر. ئۆزىمىز تىكەندەك يالغۇز ياشاۋاتقىنىمىزدا، بىز ئۆزىمىزنىڭ ئىدىيىسى بىلەن بىۋاسىتە پىكىر ئالماشتۇرالىغىنىمىزدىلا بىزنىڭ تۇرمۇشىمىز ھەقىقىي ئىلگىرى باسىدۇ.
ئىدىيە غايەت زور قۇدرەت. بۇ خىل قۇدرەت گەپ-سۆزلەردىن ئۆزىگە يول تاپىدۇ، كىشىلەرنىڭ ھەرىكىتىنى يا ھىممەتكە ياكى قارغىشقا ئېرىشتۈرىدۇ. قانداق بولۇشى، ئىدىيىنىڭ ياخشى-يامانلىقىغا باغلىق.
زەمبىرەك ئوقى ئېتىلغاندىلا ئاندىن يىراقتىن ئۇنىڭ ئېتىلغان ئاۋازىنى ئاڭلايمىز. خۇددى شۇنىڭدەك، مۇدھىش ئىدىيە ئۆزىنى ئاشكارىلىغاندىلا جىنايەت روي بېرىدۇ، بىز شۇندىلا مۇدھىش ئىدىيە پەيدا قىلغان جىنايەتنى كۆرۈپ يېتەلەيمىز.
ئۇرۇق تۇپراققا كۆمۈلگەن، ئۇنى كۆرگىلى بولمايدۇ. ۋاقىتنىڭ ئۆتىشى بىلەن ئۇرۇق ئاخىرى دەرەخكە ئايلىنىدۇ. شۇنىڭدەك، ئادەمنىڭ ئىدىيىسىمۇ سەزدۈرمەستىن ھەرىكەت قىلىدۇ، ئۆز كۈچىنى كۆرسىتىدۇ. ھالبۇكى، ئىنسانىيەت تارىخىدا ئاشۇ ئۇلۇغ ئىشلار دائىم مانا شۇنداق ئىدىيىدىن شەكىللىنىدۇ.

1-ئاينىڭ 17-كۈنى

 

گەپ-سۆز

سۆزلىگۈچىنىڭ يامان سۆز-ئىبارىسى، ئۈچ تەرەپكە زىيانلىق: سۆزلەتكۈچىگە، ئاڭلىغۇچىغا، مۇھىمى، سۆزلىگۈچىنىڭ ئۆزىگە.
ئېسىڭىزدە بولسۇن، گەپمۇ ھەرىكەتتۇر، ئۇنىڭ باشقا ھەرىكەتتىن پەرقى مۇنۇ كىچىككىنە يەردە: كىشىلەر گەپ-سۆزنىڭ كېيىنكى كەلتۈرىدىغان ئاقىۋىتىنى ئېنىق ھېس قىلىپ يېتەلمەيدۇ. شۇڭا، ئويناپ سۆزلىسىڭىزمۇ ئويلاپ سۆزلەڭ.
سەمىمىي گەپنىڭ قۇدرىتى پوپ، باش روھانىي، پادىشاھ ۋە باي-غوجاملارنىڭ گەپ-سۆزلىرىدىن ئېشىپ كېتىدۇ.
كىشىلەر قانداق سۆزلەش ۋە نېمە دېيىش كېرەكلىكىنى ئۆگىنەلەيدۇ، بىراق، بىر خىل ئىلىم بەكمۇ مۇھىم: قانداق ۋاقىتتا سۈكۈت قىلىشنى ئوڭايلىقچە ئۆگىنىپ بولمايدۇ.
چىن سۆز زېھىننى ئاچار.
−جۇڭگو تەمسىلىدىن

1-ئاينىڭ 18-كۈنى

 

ھەقىقەت

بىز بالىلىرىمىزغا ھەممىگە باب كېلىدىغان تەرتىپ-قائىدە−بۇ دۇنيادىكى ئوخشاش بولمىغان مىللەتلەر بىرلىشىشتىن ئىبارەت ھەقىقەتنى ئۆگىتىشىمىز زۆرۈر.
ھەقىقەت تۇغما ئاددىي ھەم ساپ كېلىدۇ. يالغان-ياۋىداق سۆزلەر ھەمىشە مۇرەككەپ بولۇپ، تۈگىمەس گەپ-سۆز ۋە باھانە-سەۋەبلەرگە تولغان بولىدۇ.
سىز ھەقىقەتنى سۆزلىگۈچىنى ئۆلتۈرۈپ تاشلىيالىشىڭىز مۇمكىن، ئەمما ھەقىقەت سۆزلەپ قالسا، ئۇ مەڭگۈ تىرىك تۇرۇۋېرىدۇ.
باشقىلارنىڭ ھۆكۈمىدىن ئۆگىنىۋالغان ھەقىقەت بىزنىڭ تېنىمىزگە چاپلىشىپ تۇرىدۇ، خۇددى شامدا ياسالغان يالغان بۇرۇندەك بىزگە تەئەللۇق بولمايدۇ. ئەمما، ئۆزىڭىز بايقىغان ھەقىقەت ئۆز تېنىڭىزنىڭ بىر قىسىمىغا ئوخشاش سىزگە تەئەللۇق بولىدۇ.
ھەقىقەتنى بىلىشتىكى ئەڭ چوڭ توسالغۇ، يالغانچىلىقنىڭ ئۆزى ئەمەس، بەلكى يالغانچىلىقنىڭ ئۆزىنى ھەقىقەتتەك قىلىپ كۆرسىتىشتە.

1-ئاينىڭ 19-كۈنى

 

كەمتەرلىك ۋە كىچىك پېئىللىق

بىز باشقىلارنىڭ ئەيىبلىشىدىن قورقۇپ، ھەمىشە ئۆز نۇقسانلىرىمىزنى يوشۇرىمىز. بۇ خاتادۇر، چۈنكى تەنقىدنىڭمۇ پايدىسى بولىدۇ.
ئېزىقىش تەمەننادىن كېلىدۇ. ئارزۇ-ئىستەكلەر ئېزىقىشقا ئۇچرىماسلىق ئۈچۈن، كىچىك پېئىل بولماق كېرەك.
مۇبادا، خەيرلىك ئىشنىڭ ھەقىقىي لەززىتىنى تېتىيمەن دېسىڭىز، ھېچكىمگە بىلدۈرمەي، مەخپىي رەۋىشتە، غەرەزسىز قىلىڭ. شۇنداق قىلغاندىلا، خەيرلىك ئىش سىزنىڭ سىرتىڭىزدا ۋە ئىچىڭىزدە پەيدا بولىدۇ.
ھەر بىر ئادەمنىڭ ھاياتتىكى ئاساسلىق ۋەزىپىسى پاك نىيەتلىك، تېخىمۇ ياخشى ئادەم بولۇش. ئەگەر، سىز ئۆزىڭىزنى مەن ياخشى ئادەم بولۇپ بولدۇم دەپ قارىۋالسىڭىز، سىز قانداقمۇ ئۇنىڭدىنمۇ ياخشى ئادەم بولالايسىز؟
كەمتەرلىك بەخش ئەتكەن لەززەتكە شەخسىيەتچىل ۋە تەكەببۇر ئادەملەر نائىل بولالمايدۇ.

1-ئاينىڭ 20-كۈنى

 

ئۆزىنى قۇربان قىلىش

«ئىنجىل»دا، ھاياتىنى يوقاتقان كىشى ھەقىقىي ھاياتقا ئېرىشۇر دېيىلىدۇ. شۇڭا، سىز تېنىڭىز ئۈچۈن ئەمەس، بەلكى پەقەت ئۆز روھىڭىز ئۈچۈنلا ياشىغىنىڭىزدا، ھەقىقىي ھاياتىڭىز ئاندىن باشلانغان بولىدۇ.
ئادەمنىڭ ھاياتى بىخەتەر ئەمەس، شۇڭا، ئادەم ئۆزىنىڭ ھەرقاچان ئۆلۈپ كېتىش ئېھتىماللىقىنى ئويلاپ تۇرۇشى كېرەك. شۇندىلا ھايات تېخىمۇ ئەركىن-ئازادىلىشىدۇ، ئادەم باشقىلارنى سۆيۈش ئارقىلىق ئۆز روھىنى مۇكەممەللىككە ئىگە قىلىش ئۈچۈن پۈتۈن كۈچى بىلەن كۆرۈشىدۇ.
قۇربان بېرىش بولمىسا، ھاياتمۇ بولمايدۇ. سىزنىڭ پۈتكۈل ھاياتىڭىز روھىڭىز ئۈچۈن قۇربان بېرىدىغان تېنىڭىزنىمۇ ئۆز ئىچىگە ئالىدۇ.
ھاياتتىكى ئەڭ خۇشاللىنارلىق، ئەڭ ھەقىقىي ئىش ئۆز روھىڭىزنى پەرۋىش قىلىش. بۇنىڭ ئۈچۈن ئۆزىڭىزنى بىر چەتكە قايرىپ قويۇپ، قۇربان بېرىشىڭىز زۆرۈر. چوڭ قۇربان بېرىشلەر كىچىك قۇربان بېرىشلەردىن كېلىدۇ.
ھاياتىڭىزنى مۇكەممەللىككە ئىگە قىلاي دېسىڭىز، ئۇنى قۇربان قىلىشقا تەييار تۇرۇڭ.

1-ئاينىڭ 21-كۈنى

 

تىلاۋەت

تىلاۋەت چوڭقۇر ئوي-پىكىرلەرنىڭ مەڭگۈلۈك ھەقىقىتىدۇر، ئۇ تەڭرىنىڭ ھەقىقىتى بىلەن ئۆزىنى دەڭسەش.
ھەقىقىي تىلاۋەت خەير-ئېھسان ياكى پانىي دۇنيانىڭ مەئىشەتلىرىنى تىلەش ئەمەس، بەلكى ئىچكى دۇنيادىكى ئۆز-ئۆزىنى كۈچلەندۈرۈش، پاك نىيەتلىك ئىدىيىنى كۈچەيتىشتۇر.
ھەقىقىي تىلاۋەت روھنىڭ زۆرۈرىيىتى، چۈنكى، سىز تىلاۋەت ئارقىلىق تەڭرىگە سۆزلەۋاتقىنىڭىزدا، سىزنىڭ ئىدىيىڭىز ئەڭ يۈكسەك پەللىگە يەتكەن بولىدۇ.
ھەقىقىي تىلاۋەت روھىي تۈۋرۈك، بۇرۇنقى ئىش-ھەرىكىتىمىزنى بوينىمىزغا ئېلىش ۋە ئۆزىمىزنى چەكلەش، كەلگۈسىدىكى ئىش-ھەرىكىتىمىزگە يول كۆرسىتىش.
مەن خۇدادىن مۈشكۈل ئشلىرىمنى ئاسان قىلىڭ، دەپ مەدەت تىلەيمەن. بۇ مېنىڭ تىلاۋىتم. بىراق، خۇدانىڭ ۋىسالىغا ھېچكىم يېتىپ باقمىغان، شۇنداق تۇرۇغلۇق بىز يەنە قانداقسىگە ئۇنىڭغا گەپ قىلالايمىز؟ بىز ئۇنىڭغا سۆيگۈ ئارقىلىق سۆزلەيمىز. بىز باشقىلارنى ئۆز ئەمەلىي ئىش-ھەرىكىتىمىز ئارقىلىق سۆيسەك (بۇ خۇدانىڭ بىزگە قىلغان مەرھەمىتى-ياردىمى)، مانا بۇ بىز ئېرىشكەن ئەڭ زور ھەممەتتۇر.

1-ئاينىڭ 22-كۈنى

 

ئىشلەش ۋە بىكارچىلىق

بىراۋ ئىشلىمىسە جېنىنى جان ئېتەلمەيدۇ. ئىنسانلار ئىشلىمىسە، مېھنەت قىلمىسا ئاچ-زارلىقتا ياكى دىشۋارچىلىقتا قالىدۇ. بۇنىسى ھەممىگە ئايان. بىراۋ ئىشلىمەي، راھەت-پاراغەتكە بېرىلسە، باشقىلارنىڭ ئەمگەك مېۋىسىگە چاڭ سالىدۇ.
يوقسۇل-نامراتلارغا پۇل بېرىش قىلچە خاتا ئەمەس، پەقەت شۇ پۇلنى ئۆزىڭىز ھالال تاپقان بولسىڭىزلا. «قان-تەر تۆكمىگەن قول ئاچكۆز قول، قان-تەر تۆككەن قول سېخىي قول» دېيىلىدۇ ماقالدا. 12 مۇرىت «نامرات-يوقسۇللارغا ھەدىيە قىلغان نەرسىگە قان-تەرىڭىز سىڭسۇن» دېيىشىدۇ تەلىم بېرىپ.
جىسمانىي ئەمگەك پايدىلىق، ئۇنىڭ باشقا پايدىسىنى دېمىگەندىمۇ ئۇ سىزنىڭ مېڭىڭىزنى بىر ئىشقا بەند قىلىپ، ئارتۇقچە غەم-غۇسسىدىن خالاس قىلىدۇ.
جىسمانىي ئەمگەك، جۈملىدىن، ئېتىز-ئېرىقتىكى جىسمانىي ئەمگەك سىزنىڭ تېنىڭىز ۋە روھىڭىز ئۈچۈن پايدىلىقتۇر. ئۇ، سىزنىڭ مېڭىڭىزنى ئارام تاپقۇزۇپلا قالماي، سىزنى ئانا تەبىئەتكە يېقىنلاشتۇرىدۇ. جىسمانىي ئەمگەك قىلىپ باقمىغانلار بۇنى چۈشىنىپ يېتەلىشى قىيىن.

1-ئاينىڭ 23-كۈنى

 

سۆيگۈ

چىن ئۆلىماسىدىن كىشىلەر: «نېمە ئۈچۈن ئۆگىنىسىز؟» دەپ سورىسا، ئۇ: «ئادەمنى چۈشىنىش ئۈچۈن» دېگەنىكەن. كىشىلەر يەنە: «نېمە ئۈچۈن سەمىمىي ئادەم بولماق كېرەك؟» دەپ سورىسا، «ئادەمنى سۆيۈش ئۈچۈن» دېگەنىكەن جاۋابەن.
خۇدانىڭ قانۇنلۇق تۇرمۇشىغا ئەمەل قىلىش ئۈچۈن قۇش كۆكتە ئۇچۇشى، بېلىق سۇدا ئۈزۈشى، ئادەم سۆيۈشى كېرەك. ئادەم باشقىلارنى سۆيمەي، زىيانكەشلىك قىلىپ قويسا، ئۇنىڭ قىلمىشى قۇشنى سۇدا ئۈزدۈرۈپ، بېلىقنى سامادا ئۇچۇرغاندەك ئىش بولىدۇ.
ئۆزئارا بىر-بىرىنىڭ تۇرمۇشىنى ياخشىلاشنىڭ ئەڭ ئۈنۈملۈك ئۇسۇلى مال-دۇنيا، سوغا-سالام، سەمىمىي مەسلىھەت، ھەتتا خىزمەتمۇ ئەمەس، بەلكى سۆيگۈدۇر.
ھەر بىر ئادەمنىڭ بۇرچى، سۆيگۈ-مۇھببەت يېتىلدۈرۈش، سۆيگۈ-مۇھببىتىنى بۇ دۇنياغا يەتكۈزۈش.

1-ئاينىڭ 24-كۈنى

 

ھازىردا ياشاش

بىز ۋاقىتنى ئۆتمۈش، ھازىر ۋە كەلگۈسى دەپ ئۈچكە ئايرىيمىز. رېئاللىقتا، كەلگۈسى بىلەن ئۆتمۈشنىڭ تۇتىشىش نۇقتىسى ئىنتايىن كىچىك. بۇ نۇقتا ئىنتايىن كىچىك كۆرۈنسىمۇ، ئۇ پۈتكۈل ھاياتىمىزنىڭ مەركىزىدۇر.
سۆيگۈ-مۇھەببەت ناھايىتى مۇھىم ئىش. شۇغىنىسى، ئۆتمۈشىڭىز ياكى كەلگۈسىڭىزنى سۆيەلمەيسىز، پەقەت ھازىرنى، كۆز ئالدىڭىزدىكىنى، مۇشۇ پەيتنىلا سۆيەلەيسىز.
ياشاشنىڭ مەقسىتى، گۈزەللىك يارىتىش. ئەلمىساقتىن ھازىرغا قەدەر، بۈگۈنگە قەدەر شۇنداق.
سۆيگۈ خۇدانىڭ ئوچۇق جاكاسى، سۆيگۈ ئۈچۈن ئېيتقاندا، ۋاقىت-زاماندىن ئىبارەت بۇ ئۇقۇم مەۋجۇت ئەمەس. شۇڭا، ھازىرنى، ئەتراپىڭىزدىكىنى، ھەر بىر دەقىقىدىكى ئاشۇنداق ئوچۇق جاكانى سۆيۈپلا ياشاشقا بولىدۇ.

1-ئاينىڭ 25-كۈنى

 


دۇنيادا گۇناھ يوق

زۇلمەت بولمىسا، رەڭ ۋە يورۇقلۇقنى بىلمىگەن بولاتتۇق. خۇددى شۇنىڭدەك، رەزىللىك-ئىپلاسلىق بولمىسا، ئىزگۈ-ياخشىلىق ۋە مېھىر-شەپقەتنىمۇ بىلەلمەيمىز.
دۇنيادا، رەزىللىك-ئىپلاسلىق تولىمۇ كۆپ، بىراق، بۇ كىشىلەردىكى ياخشىلىقنىڭ يېتەرلىك بولمىغىنىدىن ئەمەس، بەلكى قىلىشقا بولمايدىغان ئىشنى جېنىنىڭ بارىچە قىلىۋاتقىنىدىندۇر.
بىز ئىشەنسەك ھەمدە ئۆز قۇدرىتىمىزنى ئىدىيىمىزگە قويۇپ تۇرۇپ ئويلاپ كۆرسەك، شۇ قەدەر كۆپ رەزىللىكلەر غايىب بولۇپ، تېخىمۇ كۆپ ئىزگۈ-ياخشىلىقلار بۇ دۇنياغا كىرىپ كېلىدۇ.
بىزگە ئازاب كەلتۈرگەن ياكى جىسمانىي تۇرمۇشىمىزغا ماس كەلمىگەن شەيئىلەرنى بىز سەت ياكى رەزىل دەيمىز. ئەمما، بىزنىڭ ياشاش نىشانىمىز ئۆز روھىمىزنى تېنىمىزنىڭ ئاسارىتىدىن قۇتۇلدۇرۇش. شۇڭا، ھاياتنى مەنىۋى ياقتىن چۈشەنگەن ئادەم ئۈچۈن ئېيتقاندا، دۇنيادا رەزىللىك مەۋجۇت ئەمەس.

 1-ئاينىڭ 26-كۈنى

 

ئۆلۈم

ئۆلۈمنىڭ يېقىنلاپ قالغىنىنى بىلسەك، بۇ دۇنيادا قىلىپ بولۇشقا ئۈلگۈرەلمىگەن ئىشلىرىمىزنى قىلىۋېلىشقا ئالدىرىشىمىز كېرەك. بىراق، تاماملىيالايدىغان بىردىن-بىر ئىشىمىز، بۇ ھاياتىمىزدا باشقىلارنى سۆيۈش، كۆز ئالدىمىزدىكى شۇ بىر دەقىقىدىمۇ باشقىلارنى سۆيۈش.
ئۆلۈم بىزنىڭ روھىي قاچىمىزنى چېقىپ تاشلايدۇ. قاچىنى قاچىدىكى نەرسە بىلەن ئارىلاشتۇرۋېتىشكە بولمايدۇ.
سىز ئۆلۈمدىن قورقسىڭىز، سىزنىڭ قورقۇشىڭىز ئۆلۈمنىڭ ئۆزىدىن ئەمەس، ئۆزىڭىزدىن قورققان بولىسىز. بۇ، بەك ياخشى ئادەمنىڭ ئۆلۈمدىن قورقۇپ قالمايدىغانلىقىدىن بېشارەت بېرىدۇ. مەيلى سىز نېمىلا ئىش قىلىڭ، خۇدا بىلەن چەمبەرچاس باغلىنىپ كەتسىڭىز، مەڭگۈ خۇشاللىق تاپالايسىز.
كۈنلەرنىڭ بىرىدە، سىز ياشاپ بۈگۈنكى كۈنگە كەلگەن بولسىڭىزمۇ ئۆزىڭىزنىڭ ھەقىقىي تۇغۇلۇپ باقمىغانلىقىڭىزنى ھامان ھېس قىلىپ يېتىسىز. مانا بۇنى ھېس قىلغىنىڭىزدىلا ئاندىن ئۆزىڭىزنىڭ مەڭگۈ ئۆلمەيدىغانلىقىڭىزنى چۈشىنەلەيسىز.

1-ئاينىڭ 27-كۈنى

 

ئۆلگەندىن كېيىن

بىز ئادەتتە، ھاياتنى تۇغۇلۇپ ئۆلگىچە داۋاملىشىدۇ، دەپ قارايمىز. بۇ خۇددى دەريانىڭ قاش-قىرى بۇزۇلۇپ، سۇ ئېقىپ كەتسىلا دەريامۇ يوقىلىدۇ، دېگەندەكلا بىر ئىش.
پۈتكۈل قەلبىڭىز بىلەن خۇدانى سۆيگىنىڭىزدە، شۇنى ھېس قىلىسىزكى، سىزنىڭ ھاياتىڭىز سىزنىڭ ئۆلۈمىڭىز بىلەنلا ئاخىرلاشمايدۇ.
كىشىلەر ئۆلىمادىن مەڭگۈلۈك ھايات خۇسۇسىدا سوراپتۇ: «ئەجەل يېتىپ كەلسە، بىز قانداق بولۇپ كېتەرمىز؟» ئۆلىما جاۋابەن شۇنداق دەپتۇ: «ماڭا بۇ دۇنيانىڭ لازىمى يوق، ئەجەلدىن قورقمايمەن، چۈنكى، مېنىڭ روھىم ئۆلمەيدىغانلىقى ئۆزۈمگە ئايان.»
خۇدا مەڭگۈلۈكتۇر، ئۇ ھەممىنى ئۆز قوينىغا ئالىدۇ، ماكان-زاماندىن ھالقىپ تۇرىدۇ. خۇدا پۈتكۈل بولۇملاردۇر. كۈللىيات خۇدا ۋۇجۇدىدا مەۋجۇت بولۇپ تۇرىدۇ. بارچە ھاياتلىق پەيدا بولغاندا، يوقلۇقتىن بار بولۇپ قالغان ئەمەس، بەلكى ھەممىسى خۇدادىن تۆرەلگەن. ئەزرائىل بىزنى ئېلىپ كەتكەندە، بىزنى يوقلۇققا ئېلىپ كەتمەيدۇ، بەلكى بىزنى خۇدانىڭ ئالدىغا قايتۇرۇپ كېلىدۇ.

1-ئاينىڭ 28-كۈنى

 

ھايات بىزگە كۆرسىتىلگەن ھىممەت

دۇنيادىكى كۈللىيات بىز ئۈچۈن بېرىلگەن ھىممەتتۇر. ئەگەر، سىز توغرا كۆزەتسىڭىز، ئىزگۈلۈك بار يەردىن ياخشىلىق ئىزدەش−ئۆز روھىڭىز خۇدا بىلەن بىر گەۋدىگە ئايلانغان يەردىن ئىزدەش ئارقىلىق سىز ئۆزىڭىزگە كېرەكلىك بولغان ھەممە نەرسىگە ئېرىشەلەيسىز.
ھايات دۇنيادىكى ئەڭ يۈكسەك بەخت-سائادەتتۇر. بىز ھەمىشە بۇ ھاياتىمىزدىكى خۇشاللىقلارغا سەل قارايمىز، بىر كۈنلەردە ئاللىقانداق بىر جايلاردا تېخىمۇ زور بەخت-سائادەتكە ئېرىشىشنى ئىستەيمىز. ھالبۇكى، دۇنيادا بۇ ھاياتتىنمۇ ئۆتە بەخت-سائادەت بولمايدۇ−ئۇ سىزنىڭ كۈندىلىك تۇرمۇشىڭىزدا.
ئۆزىڭىزنىڭ ھەقىقىي بەخت-سائادىتىگە قول سوزسىڭىزلا ئېرىشەلىشىڭىز مۇمكىن. ئۇ كۆلەڭگىگە ئوخشايدۇ، ھالال نىيەتلىك تۇرمۇشقا ئەگىشىپ بارىدۇ.
سىزنىڭ تۇرمۇشىڭىز مۇبادا چەكسىز بەخت-سائادەت ۋە چەكسىز خۇشاللىققا ئوخشىماي قالسا، ئۇنىڭ نىشانى تېخىمۇ يىراقلاپ كېتىدۇ.
بۇ خىل تۇرمۇشنى بېشىڭىزدىن ئۆتكۈزۈپ بېقىڭ: ھايات ئاخىرلىشىش ئالدىدا تۇرغاندا، قالدى ۋاقىتلار سىز ئويلاپمۇ باقمىغان ھەدىيەگە ئايلانسۇن.

1-ئاينىڭ 29-كۈنى

 

بەخت

سىزنىڭ قەلبىڭىز، ھەقىقىي بەخت-سائادەتنىڭ بۇلىقى. ئۇنى باشقا يەردىن ئىزدەش ھاماقەتلىكتۇر. سىز مالچىغا ئوخشايسىز، ئەس-يادىڭىز قويدا، ئۇنى ئىزدەپلا تۇرىسىز.
پاراسەتنىڭ ئەڭ مۇھىم پرىنسىپى ئۆزىنى بىلىش. بىراق، ئۆزىنى بىلىش بەكمۇ تەس. پەزىلەتنىڭ مۇھىم پرىنسىپى كىچىك ئىشتىنمۇ خۇشاللىق تېپىش؛ ھالبۇكى بۇنداق قىلىشمۇ تەس. پەقەت مۇشۇنداق پرىنسىپلارغا ھۆرمەت قىلغان كىشىلا كۈچلىنىپ، باشقىلارنىڭ نەزىرىدە ئەخلاق-پەزىلەتكە ماسلاشقان بولىدۇ.
ئەگەر، سىز ئۆزىڭىزنىلا سۆيسىڭىز، ھەقىقىي بەختلىك بولالمايسىز. باشقىلار ئۈچۈنلا ياشىغىنىڭىزدا، ئاندىن ھەقىقىي بەختنى تاپقان بولىسىز.
قوۋناق ياشاشنى بىلمەيدىغانلار، سىلەر نەلەردە ئارىسالدى بولۇپ ئۇياقتىن بۇ ياققا مېڭىپ يۈرىسىلەر؟ سىلەر تېخىمۇ بەختلىك تۇرمۇشنى ئىزدەۋاتامسىلەر؟ سىلەر باشقا يەرلەردە قېچىپ يۈرىسىلەر، ئەمما بەخت سىلەرنىڭ قەلبىڭلاردا. ئەگەر، قەلبىڭلاردا بەخت بولمىسا ئۇنى ھېچ يەردىن تاپالمايسىلەر. بەخت سىزنىڭ باشقىلارنى سۆيۈش ئىقتىدارىڭىزدا.

1-ئاينىڭ 30-كۈنى

 

سۆيگۈ-مۇھەببەت

سىز تۇغۇلغاندىن باشلاپ تاكى قازا قىلغانغا قەدەر ياخشى ئادەم بولسام دەپلا ئويلايسىز، ھەمدە شۇنداق شەرتنى ئۆزىڭىزدە ھازىرلاپ بولغان بولىسىز. مۇبادا، سىز توغرا يولدىن ئىزدىسىڭىز بۇنداق ئىزگۈ-ياخشىلىقلارنى ئوڭايلا تاپالايسىز. بەلكى، ئىزگۈلۈك خۇدانى، باشقا بارچە كىشىنى سۆيۈشتۇر.
بەختلىك بولاي دېسىڭىز، مۇنۇ بىر ئىشنى قىلىشىڭىز−باشقىلارنى سۆيىشىڭىز كېرەك. ھەر بىر كىشىنى سۆيۈڭ، مەيلى ئۇ ئەسكى ياكى ياخشى بولىشىدىن قەتئىي نەزەر. ئۆزلۈكسىز سۆيۈش، سىزنى ئۇزاق مۇددەتلىك خۇشاللىق ۋە بەخت-سائادەتكە نائىل قىلىدۇ.
بارچە جانلىقلارغا بولغان سۆيگۈڭىزنى ۋە خۇداغا بولغان سۆيگۈڭىز بىلەن بىرلەشتۈرۈڭ، ئۆز ھاياتىڭىزدا بۇنىڭغا دىققەت قىلسىڭىز، سىزنىڭ ھاياتىڭىز بىردىنلا ئۆزگىرىدۇ. ئازاب چېكىشتىن، بەختنىڭ خۇشاللىقىغا چۆمۈلىسىز.
سىز خۇدانىڭ ئىرادىسىگە مەيلى ھۆرمەت قىلىڭ ياكى قىلماڭ، خۇدانىڭ ئىرادىسىنى ئىشقا ئاشۇرمىقىڭىز كېرەك. سىزنىڭ قىلالايدىغىنىڭىز، پەقەت ئۇنىڭغا قارشىلىق قىلىش ياكى سۆيگۈ شەكلىدە ئۆز قەلبىڭىزنى ئۇنىڭ بىلەن تولدۇرۇش−شۇ سەۋەبلىك چەكسىز بەخت-سائادەتكە ئېرىشىش.
خۇدانىڭ پادىشاھلىقى سىزنىڭ قەلبىڭىزدە. قەلبىڭىزدە سۆيگۈ شارابى لىق تولدۇرۇلغان بولسىلا قەلبىڭىزدە بەختىڭىز چېچەك ئاچىدۇ.

1-ئاينىڭ 31-كۈنى

كۈنىگە بىر ئەقىل (باھارنامە) 2-ئاي

ئېتىقاد

خۇدانىڭ قانۇنى، خۇدا بىزنى قىلىشقا بۇيرۇغان ئىشنى قىلىپ، قىلماسلىققا بۇيرۇغان ئىشلارنى قىلماسلىق.
ھەقىقىي دىن تەبىئەتتىن ھالقىغان ھادىسىلارغا ئىشەنمەيدۇ، قائىدە-مۇراسىملارغا بەك ئەمەل قىلىپمۇ كەتمەيدۇ. ھەقىقىي دىن بىر ئادەمنىڭ باشقىلارغا ۋە چەكسىز دۇنياغا مۇئامىلە قىلىش پوزىتسىيىسى، ئۇ ئەقلىي كۈچ ۋە زامانىمىزنىڭ بىلىملىرىنى ئاساس قىلىدۇ.
ئوخشاش بولمىغان ئېتىقاد ۋە دىنلارنىڭ توختاۋسىز ئۆزگىرىپ تۇرىدىغان، ئوخشاش بولمىغان ئەھكام ۋە قائىدە-يوسۇنلىرى بار، ئۇلارنىڭ بەزىسى ئۆزگەرمەس ۋە مەڭگۈلۈكتۇر. مانا شۇ مەڭگۈلۈك ئەھكاملارنىڭ ئۆزى ھەقىقىي دىندۇر.
بەزىلەر، سىز يالغان سۆزلەش بىلەنلا كۈن ئۆتكۈزىسىز، دېيىشىدۇ. ئۇلار ھەقىقەت ئىچىدە ياشايدۇ−بۇ، بىر ئادەم ئېغىزدىن چىقىرالايدىغان ئەڭ شەپقەتسىز سۆزلەردۇر. بىراق، كىشىلەر ھەمىشە مۇشۇ بەزى سۆز-ئىبارىلەرنى ئىشلىتىپ، دىندىن ئېغىز ئېچىشىدۇ.
دىننى تۇرمۇشتىكى ئىككىنچى ئورۇنغا قويىدىغان ئادەمنىڭ ئەسلىدىنلا دىنى مەۋجۇت بولمايدۇ.

2-ئاينىڭ 1-كۈنى

 

روھ

ھاياتتا ئىككى يول بار: بىرى، تەن ئۈچۈن ياشاش؛ يەنە بىرى، روھ ئۈچۈن ياشاش. ئەگەر، تەن ئۈچۈن ياشىسا، ئەمەلىيەت شۇنى ئىسپاتلايدۇكى، تەن شادلىقى تولىمۇ ئاجىز-زەئىپ كېلىدۇ، ۋاقىتنىڭ ئۆتۈشى بىلەن تېخىمۇ ئاجىزلاپ بارىدۇ، ئۆلۈم بىلەن ئاخىرلىشىدۇ. ئەكسىچە، مۇبادا، روھ-مەنىۋىيەت ئۈچۈن ياشىسا، تۇرمۇشنىڭ خۇشاللىقى ۋاقىتنىڭ ئۆتۈشى بىلەن ئېشىپ بارىدۇ، ئۆلۈممۇ ئۇنىڭ ئالدىدا قورقۇنچلۇق نەرسە بولماي قالىدۇ.
بىز كىم؟ بىز «يوقلۇق». ھەقىقەتەن بىز «يوقلۇق»تۇرمىز. ھالبۇكى، بۇ «يوقلۇق» ئۆزىنى ھەمدە بۇ دۇنيادىكى ئورنىنى چۈشىنەلەيدۇ.
سىز ئۆزىڭىزنى جىسمانىي مەۋجۇدىيەت دەپ قارىغىنىڭىزدا، سىز ئۆزىڭىزنى گاڭگىرىتىدىغان چۈشىنىكسىز سىرغا ئايلىنىپ قالىسىز. سىز، ئىچكى «ئۆز-ئۆزىڭىز»نىڭ جىسمانىي روھىيىتىڭىزنى ئۆز ئىچىگە ئالىدىغىنىنى بىردىنلا چۈشىنىپ يەتكىنىڭىزدە، بۇ سىر شۇ زامات يوقۇلۇپ، دۇنيا ئاسانلا چۈشەنگىلى بولىدىغان نەرسىگە ئايلىنىپ قالىدۇ.
بىز جىسمىمىزنىڭ قۇدرىتى بىلەن تەبىئەتنىڭ قۇدرىتىنى سېلىشتۇرساق−بىز «يوقلۇق». ناۋادا، ئۆزىمىزنىڭ روھىنى كۆرۈپ يېتەلىسەك (ئۇ ئىلاھ روھىنىڭ بىر قىسىمى)، بىزنىڭ باشقا جانلىقلاردىن ئۈستۈن تۇرىدىغانلىقىمىزنى چۈشىنىپ يېتەلەيمىز.

2-ئاينىڭ 2-كۈنى

 

بارلىق جانلىقلارنىڭ روھى بىر
كۆپ ساندىكى كىشىلەر، ئۆزىنىلا مۇھىم، باشقىلارنى مۇھىم ئەمەس، دەپ قارايدۇ. بىراق ياخشى، سەمىمىيەتچىل دانالارمۇ بار، ئۇلار باشقا كىشىلەر ۋە ھايۋاناتلارنىڭ ھاياتىمۇ ئۆزلىرىنىڭ ھاياتىدەكلا مۇھىم ئىكەنلىكىنى ھەم چىن كۆڭلىدىن كۆيۈنۈش كېرەكلىكىنى بىلىدۇ. بۇنداق ئادەملەر ئالدىدا ھايات-ماماتمۇ ئادەتتىكىلا بىر ئىش.
بۇرۇن ئادەملەرنىڭ ھەممىسى ئادەم گۆشىنى يېگەن ھەم ئادەم گۆشى يېيىشنى قىلچە خاتا، دەپ قارىمىغان شۇنداق دەۋرلەرمۇ بولغان. ئەمدىلىكتە، بارغانچە كۆپلىگەن ئادەملەر باشقىلارنىڭ ۋە ھايۋاناتلارنىڭ گۆشىنى يېيىش قەبىھ قىلمىش دەپ چۈشىنىدىغان بولدى. كەلگۈسىدە ھامان بىر كۈنى، كىشىلەر مال-چارۋا، ئۆي قۇشلىرىنى سويۇش ۋە كالا، قوي، چوشقا گۆشىنى يېيىش، ئادەم ئۆلتۈرگەنگە ئوخشاشلا قەبىھ ئىش دەپ قارايدىغان بولىدۇ.
ئادەم، ھايۋانات، بارچە جانلىقلارنىڭ ھەممىسى بىر-بىرى بىلەن زىچ مۇناسىۋەتلىك. بىر خىل جانلىق ئازاب چەكسە، باشقا جانلىقمۇ ئازاب چېكىدۇ. شۇنىڭدەك، بىر خىل جانلىق خۇشال بولسا، ئۇ خۇشاللىق تارقىلىپ بېرىپ باشقا جانلىقنىمۇ خۇشال قىلىدۇ.
پەقەت سىزلا ھەر بىر ئادەمدىن ئۆزىڭىزنى كۆرۈپ يېتەلىسىڭىز، سىز ئاندىن بۇ ھاياتنى چۈشىنەلەيسىز.
2-ئاينىڭ 3-كۈنى


خۇدا

خۇدانى ساڭرامدىن ئىزلىمەڭ. ئۇ سىزنىڭ دىلىڭىز، سىزنىڭ قەلبىڭىز، سىزنىڭ ئىچىڭىزدە. ئۆزىڭىزنى خۇداغا تاپشۇرۇڭ، شۇندىلا خۇشاللىق ۋە بەخت-سائادەتلەر سىزگە مەڭگۈ يار بولىدۇ.
مۇستەقىل ئىدىيىسى بار ئادەم، ئۆزىنىڭ روھى بىلەن كائىناتنىڭ روھى−خۇدانىڭ بولۇمىنى سېزەلەيدۇ. بىراق، ئۇ كۈنلەرنىڭ بىرىدە ئامال ئىزدەپ، بۇ چۈشەنچىلەرگە تەبىر بېرىشكە ياكى ئىزاھلاشقا ئورۇنسا،  كەمتەرلىكىنى يوقىتىپ قويىدۇ-دە، ئۇلارنىڭ سىرتقى يۈزىنى ئوراپ تۇرغان چۈمپەردىلەرگە تېگەلمەيدۇ. بارچە مىللەتلەرنىڭ ھەممىسى بۈيۈك، ئەڭ يۈكسەك روھنى تەشەببۇس قىلىدۇ، ئۇنى ھەر خىل ناملار بىلەن ئاتايدۇ، ھەر خىل تونلارنى كىيگۈزىدۇ. مانا شۇ ناملار ۋە تونلارنىڭ ئاستىدا پەقەت خۇدالا مەۋجۇت.
−رۇسسو (فرانسىيە)
خۇدا بىزنىڭ ھاياتىمىز ۋە دۇنيادىكى باشقا بارلىق ھاياتنى يېتەكلەيدۇ.
خۇدا جىمى ئادەملەرنىڭ ھەممىسى ياخشى بولسا، دەيدۇ. مۇبادا، سىزمۇ باشقا ھەممە ئادەملەرنىڭ ياخشى بولۇشىنى ئىستىسىڭىز، سىزنىڭ دىلىڭىزدا خۇدا بولغان بولىدۇ.
سىز خۇدانىڭ نامىنى ئاتاپ يۈرمىسىڭىزمۇ بولىدۇ، ئەمما، ئۇنىڭ مەۋجۇتلۇقىنى ئىنكار قىلسىڭىز بولمايدۇ. خۇدا مەۋجۇت بولمىسا، دۇنيادا ھېچنەرسە مەۋجۇت بولمايدۇ.

2-ئاينىڭ 4-كۈنى

 

روھنىڭ بىردەكلىكى

مۇبادا، ئۆزىڭىزنىڭ تېنى ئۈچۈنلا ياشىسىڭىز، بىر خىل مۇھىم بولۇم−«مەن»لا مەۋجۇت بولىدۇ. ھالبۇكى، دۇنيادا يەنە مىليونلىغان كىشىلەرنىڭمۇ بەختلىك بولغۇسى كېلىدۇ، ئۇلار ئوتتۇرىسىدا ئۆز ئارا قارشىلىق بولغانلىقى ئۈچۈن ھېچكىممۇ ئۈزۈل-كېسىل رازى بولمايدۇ. سىزنىڭ «مەن»ىڭىز سىزگە دەيدۇلەركى: سېنىڭ جىسمىڭ مەڭگۈلۈك مەۋجۇت بولۇپ تۇرالمايدۇ، ۋاقىتنىڭ ئۆتۈشىگە ئەگىشىپ يوقىلىدۇ ياكى ئۆلىدۇ. بۇ زىددىيەتنى ھەل قىلىشنىڭ بىردىن بىر يولى: ئۆزىڭىزنىڭ «ئۆزلۈك»ى تېنىڭىزدىلا ئەمەس، بەلكى روھىڭىزدىمۇ مەۋجۇتلۇقىنى ئېتىراپ قىلىڭ. روھ سۆيگۈ-مۇھەببەت ئارقىلىق سىزنىڭ «ئۆزلۈك»ىڭىزنى باشقىلار بىلەن باغلاپ تۇرىدۇ، چۈنكى، روھ ئۆلمەيدۇ.
تەن ئۆزىگە ئەڭ پايدىلىق نەرسىگە ئېھتىياجلىق، ئۇ روھقا زىيان سالغان تەقدىردىمۇ شۇنداق. روھ ئۆزىگە ئەڭ پايدىلىق نەرسىگە ئېھتىياجلىق، ئۇ تەنگە زىيان سالغان تەقدىردىمۇ شۇنداق. سىزنىڭ ھاياتىڭىز تەندە ئەمەس، چۈنكى، تەن يوقىلىدۇ ۋە ئۆلىدۇ، تەن ئۆلمەس روھىڭىزنىڭ ئۆتىڭى. سىز بۇنى چۈشىنىپ يەتكەندىلا تېنىڭىز بىلەن روھىڭىزنىڭ كەسكىن ئېلىشىشى، كۆرۈشى يوقىلىدۇ.
ئۆز تېنىڭىزنىڭ نەقەدەر ئاجىز، زەئىپلىكىنى بىلگەندىلا سۆيگۈ-مۇھەببەتنىڭ نەقەدەر ياخشىلىقىنى بىلەلەيسىز.

2-ئاينىڭ 5-كۈنى


مېھىر-مۇھەببەت

سۆيگۈ-مۇھەببىتىڭىزگە لايىق جاۋابقا ئېرىشىشنى ئويلىسىڭىز، بۇ ھەقىقىي مۇھەببەت بولماي قالىدۇ. سۆيگۈ-مۇھەببەتنىڭ ماھىيىتى ئۆز ئەتراپىڭىزدىكىلەرنىڭ ھەممىسىگە غەرەزسىز ھىممەت كۆرسىتىش، ئۇنىڭ ئۈچۈن ھېچقانداق جاۋاب كۈتمەسلىك.
ئادەم تۇرمۇش قارىشىغا تايىنىپ ئەمەس، بەلكى سۆيگۈسىگە تايىنىپلا ياشايدۇ.
سىز خەيرخاھلىققا موھتاج، باشقا جىمى كىشى دوستلۇققا نائىل بولۇشنى ئارزۇلىسا، سىزمۇ دوستلۇققا نائىل بولالايسىز.
دۇنيادا ياخشىلىق كۆپ بولسىمۇ، ھەقىقىي ياخشىلىق پەقەت بىرلا: باشقىلارنى سۆيۈش.
مەلۇم سەۋەب، غەرەز ئارىلاشقان مۇھەببەت ساپ مۇھەببەت ئەمەس. سەۋەبسىز، شەرتسىز، چەكسىز مۇھەببەتلا مەڭگۈلۈك مۇھەببەتتۇر. بۇنداق مۇھەببەت يوقىلىپ كەتمەيدۇ، ئەكسىچە، ۋاقىتنىڭ ئۆتىشىگە ئەگىشىپ تېخىمۇ كۈچىيىپ بارىدۇ.

2-ئاينىڭ 6-كۈنى

 

خاتالىق

ھەرقانداق تۇرمۇش خاتالىقنى، ئۆزىڭىز تولدۇرۇۋەتكەن خاتالىقنىمۇ ئۆز ئىچىگە ئالىدۇ. بىزنىڭ خاتالىقىمىز تۇخۇمنىڭ شاكىلى ياكى بۇغداي دانىسىغا ئوخشايدۇ، يېڭى ھاۋا ۋە سۇ بىلەن ئۇچراشسا چۈجە تۆرەلمىسى ياكى مايسا ئۈندۈرمىسى پەيدا بولىدۇ.
سىزنىڭ تېنىڭىز روھىڭىز ئۈچۈن خىزمەت قىلىشى كېرەك. بىراق، تۈرلۈك شارائىت سەۋەبلىك ھەمىشە ئۇنىڭ ئەكسىچە بولۇپمۇ قالىدۇ. مانا بۇ مەن ئېيتىۋاتقان «خاتالىق».
مەنىۋى دۇنيادا پۈتكۈل ھەممە ماددىي دۇنيادىكى ئۆز ئارا مۇناسىۋەتتىنمۇ يېقىن بولىدۇ. ھەرقانداق يالغان سۆز تېخىمۇ كۆپ يالغان سۆزلەرنى پەيدا قىلىدۇ، ھەرقانداق شەپقەتسىزلىك تېخىمۇ كۆپ شەپقەتسىزلىكلەرنى كەلتۈرۈپ چىقىرىدۇ.
قاراپ باقىدىغان بولساق، بالىلار چوڭ ئادەملەردىن پاك ساقلىنىپ قالغان بولىدۇ. ئونىدىن سەككىز-توققۇزىنىڭ نىيەت-ئىقبالىنى چوڭلار تېخى بۇلغاشقا ئۈلگۈرمىگەن بولىدۇ. چوڭلار ئۆزى بىلەن كۈرەش قىلمىسا بولمايدۇ.

2-ئاينىڭ 7-كۈنى

 

ئېزىقىش

تېنىڭىزنىڭ ھاجىتى چۈشكەندە، ئۇنىڭ تەلىپىنى يەنە قاندۇرۇڭ، ئەمما، تېنىڭىزنى خۇشال قىلىدىغان بەك كۆپ ئۇسۇللارنى تاپىمەن، دېمەڭ. ئۆز تېنىڭىزنى ھەددىدىن زىيادە خۇشال قىلىش، ماھىيەتتە ئۆزىڭىزگە زىيانلىق.
پاك ياشاڭ، تېنىڭىز روھىڭىزغا خىزمەت قىلسۇن، ھەرگىزمۇ ئەكسىچە بولۇپ قالمىسۇن.
سىزنىڭ ئازابىڭىز تېنىڭىزدە، روھىڭىز نېمىگە ئازابلانغانلىقىڭىزنى بىلمەيدۇ. سىزنىڭ روھىي تۇرمۇشىڭىز قانچىكى ئاجىز بولسا، ئازابىڭىز شۇنچىكى كۈچلۈك بولىدۇ. ئەڭ ياخشىسى، كۆپرەك ئۆز روھىڭىزغا تايىنىپ ياشاڭ.
ئاشقازاننىڭ خىزمىتى روھىڭىزغا سېلىنغان كويزا-كىشەنگە ئوخشايدۇ. سىز ئاچلىقتىن قۇتۇلۇش ئۈچۈن يەپ-ئىچىڭ، ھەرگىزمۇ خۇشاللىق تېپىش ئۈچۈن ئەمەس.
سىز يېمەك-ئىچمەك، قىممەت كىيىم-كېچەك ۋە كۆڭۈل ئېچىشلارغا قانچە ئاز كۆڭۈل بۆلسىڭىز، سىزنىڭ ئەركىنلىكىڭىز شۇنچە كۆپىيىدۇ.

2-ئاينىڭ 8-كۈنى

 

ئىشلەش ۋە بىكارچىلىق

ئەگەر سىز ئىشلەشنى خالىمىسىڭىز، شەرمەندىلىككە ياكى زورلۇققا ۋە ياكى ئوغرىلىققا تايىنىپ ياشىشىڭىزغا توغرا كېلىدۇ.
بىزنىڭ باشقىلارغا بولغان ھۆرمىتىمىز، ئۇنىڭ بايلىقى ئەمەس، سىڭدۈرگەن مېھنەت-ئەجرىگە يارىشا بولىدۇ. ئادەتتە، ھۇرۇن بولسىمۇ بەك باي كەلگەن ئادەملەر ھۆرمەت تېپىپ كېتىدىغان، پايدىلىق جىسمانىي ئەمگەك بىلەن مەشغۇل بولغانلار، ئالايلۇق، دېھقانلار ۋە ئىشچىلار ھۆرمەت تاپالمايدىغان شۇنداق بىر تۈلۈك ئەھۋالمۇ مەۋجۇت. بۇ خاتادۇر.
پاك تۇرمۇشقا ئەڭ زىيانلىق بولغىنى، ئادەتتىكى كۈندىلىك تۇرمۇشقا−ئۆزىڭىز قول سېلىپ ئاش-تاماق ئېتىش، كىر-قات يۇيۇش، ئۆي تازىلاشقا سەل قاراش. بايلارنىڭ كۆپىنچىسى بۇنداق ئۇششاق-چۈششەك ئائىلە ئىشلىرىنى قىلىشتىن باش تارتىدۇ. ئەمما، بۇلار سەمىمىي، ھالال ئادەملەر ئۈچۈن ئۆز تۇرمۇشىدىكى مۇھىم ئىشتۇر.
مۇبادا سىز باشقىلار ئۈچۈن مېھنەت سىڭدۈرگەن بولسىڭىز، بۇنىڭ ئۈچۈن ئۇيۇلۇپ يۈرمەڭ، شۇنداقلا ھەددىدىن ئارتۇق ئىش ھەققى ئالىمەن دەپمۇ يۈرمەڭ. شۇنىسى ئېسىڭىزدە بولسۇن، سىز باشقىلارغا بەخت يارىتىش ئۈچۈن ئۈن-تۈنسىز تەر تۆككىنىڭىزدە، ئەمگىكىڭىزنىڭ ئۆز روھىڭىزغىمۇ پايدىسى تېگىدۇ.

2-ئاينىڭ 9-كۈنى

 

ھاۋايى-ھەۋەس ۋە شەھۋانىي ھېسسىيات

كىشىلەر جىسمانىي مۇھەببەت بىلەن مەنىۋى مۇھەببەتنىڭ پەرقىنى ھەمىشە ئايرىمايدۇ. سىز بۇ ئىككىسىنىڭ ئەقەللىي پەرقىنى ئايرىيالمىسىڭىز، سەپسەتە بىلەن ھەقىقەتنى ئايرىيالمايسىز.
ھەزرىتى ئەيسا ئۆزىگە ئەگەشكۈچىلەرگە: «سىلەر ‹زىناخورلۇق قىلماڭلار› دېگەننى ئاڭلىغانمۇ› دەپتۇ. مەن سىلەرگە ئېيتىپ بېرەي: قىز-خوتۇنلارنى كۆرگەندە، شەھۋەتپەرەسلىك خىيالى كۆڭلىدىن كەچسە، بۇنداق كىشى كۆڭلىدە ئۇنىڭ بىلەن زىنا قىلغان بولىدۇ». بۇ دىنىي ئەقىدە بويىچە بولغاندا، ئادەم ئىمكانىيەتنىڭ بارىچە نەپسىنى يىغىپ ياشىشى كېرەك، شۇنداق بولغاندىلا ئەڭ ياخشى ئىشلارنى قىلغىلى بولىدۇ.
ھاماقەتلەر، كۆڭلى خۇشال بولسىلا بولدى، دەپ بىلىشىدۇ، بۇنداقتا گۇناھ بولىدۇ. خۇددى شۇنىڭدەك، جىنسىي مۇناسىۋىتتە ئۆز كۆڭلىنى ئېچىشنىلا ئويلىسا، ئوخشاشلا گۇناھ بولىدۇ. ئۇ، روھقا زىيانلىق.
بەزىلەر، نىكاھ-توي ۋە بالىغا بولغان ئارزۇغا نىسبەتەن، ئۆزلىرى خۇدانىڭ قانۇنىغا ھۆرمەت قىلىشمايدۇ-يۇ، خوتۇن-بالىلىرىنىڭ خۇدا قانۇنىغا ھۆرمەت قىلىشىنى ئارمان قىلىشىدۇ.

2-ئاينىڭ 10-كۈنى

 

گۇناھ

تەننىڭ گۇناھى، ئالايلۇق، نەپسى تويماسلىق، ھۇرۇنلۇق ۋە شەھۋەتپەرەسلىكلەرنىڭ ئۆزى رەزىللىكتۇر، بىراق، ئۇنىڭ رەزىللىكى كىشى بىلەن كىشى ئوتتۇرىسىدىكى دۈشمەنلىكنىڭ پەيدا بولۇشىغا سەۋەب بولىدۇ.
مۇبادا سىز، ھەر بىر ئادەم مېنى ياخشى كۆرسۇن دېسىڭىز، ماددىي مەنپەئەتكە زىيادە ئېتىبار بېرىپ كەتمەڭ، چۈنكى، باشقىلار ئېرىشكەن نەرسىنىڭ ھەممىسىگە سىزنىڭمۇ ئېرىشەلىشىڭىز ناتايىن. ئەكسىچە، سىز روھىڭىزنىڭ خۇشاللىقىنى قىزغىن سۆيۈشىڭىز كېرەك−روھىي خۇشاللىق ھەممە كىشى ئىگە بولالايدىغان نەرسىدۇر.
باشقىلارنى چۆكۈرمەڭ ھەم ئۇچۇرۇپمۇ يۈرمەڭ. باشقىلارنى چۆكۈرۈش، باشقىلارنىڭ ئارتۇقچىلىقىنى توسۇۋالىدۇ. باشقىلارنى زىيادە ئۇچۇرۋېتىش، باشقىلارغا بولغان ئۈمىد-تەلەپنى زىيادە چوڭايتىۋېتىدۇ. سىزنىڭ باشقىلارغا بولغان ھۆرمىتىڭىز، باشقىلارنىڭ سىزگە بولغان ھۆرمىتى بىلەن باراۋەر بولسۇن.
بۇددا مۇرىتلىرى، گۇناھ ھاماقەتلىكنىڭ نەتىجىسى ئەمەس، دېيىشىدۇ. بۇ قاراش بارچە گۇناھلار، جۈملىدىن، باشقىلارغا بولغان ئۆچمەنلىك-ئاداۋەت ۋە دۈشمەنلىكنى ئىپادىلەشكە ماس كېلىدۇ.

2-ئاينىڭ 11-كۈنى

 

تەكەببۇرلۇق

قېرنداشلىرىغا قىر كۆرسىتىش، قېرنداشلىرىنى سۆيگەنلىك ئەمەس، بۇ ئىپلاسلىقتۇر. ئەمما، ئۆزىنى قېرىنداشلىرىدىن قالتىس چاغلاش، ئۇنىڭدىنمۇ ئۆتە ئىپلاسلىقتۇر.
ئۆزىنى باشقىلاردىن يۈكسەك بىلىۋېلىش، ھاماقەتلىك. بىر دۆلەت ئۆزىنى باشقا دۆلەتلەردىن كۈچلۈك چاغلىۋېلىش، تېخىمۇ ھاماقەتلىك.
ئادەم ھەرقانچە يۈكسەك بولۇپ كەتسىمۇ ئاسمانغا چىقىپ كېتەلمەيدۇ، شۇنداقلا ئۇ ئۆزىنى كەمكۈتسىز ھالدا مۇكەممەللەشتۈرەلمەيدۇ.
سىز پەقەت ماددىي تۇرمۇشىڭىز بىلەنلا باشقىلارنى مەنسىتمەسلىكىڭىز مۇمكىن. ھالبۇكى، سىز ناۋادا مەنىۋى تۇرمۇشقا دىققەت قىلسىڭىز، ھەممە ئادەمنىڭ ئۆزىڭىز بىلەن باراۋەر ئىكەنلىكىنى بىلىپ يېتەلەيسىز.
باراۋەرسىزلىك بىلەن ھەقىقىي سۆيگۈ-مۇھەببەت زادىلا سىغىشالمايدۇ. سۆيگۈ قۇياشتۇر، ئۇ ھەممە كىشىنى يورىتىدۇ. مەگەرچەندە، ئۇ بەزى ئادەملەرنىلا يورۇتۇپ، يەنە بەزى ئادەملەرنى يورۇتالمىسا، ئۇنى قۇياش دېمەيمىز، سۆيگۈمۇ دېمەيمىز.

2-ئاينىڭ 12-كۈنى

 

شۆھرەتپەرەسلىك ۋە نام-ئاتاق

نام-ئاتاق ئۈچۈنلا ياشاش تولىمۇ خەتەرلىكتۇر. ئۆزىڭىز ئۈچۈنلا ياشىسىڭىز، سىزنىڭ مەغلۇبىيىتىڭىز ئۆزىڭىزنى نابۇت قىلىدۇ. ئەمما، نام-ئاتاق ئۈچۈنلا ياشىسىڭىز، باشقىلارنى ھەسسىلەپ نابۇت قىلىسىز.
باشقىلارنىڭ سىزگە قانداق قارايدىغانلىقىغا بەك پەرۋا قىلىپ كەتمەڭ. بۇنداق پەرۋاسىزلىق بولمىسا، سىز ئەركىن-ئازادە بولالمايسىز.
يېتەرسىزلىك ۋە ئېزىقىش يېشىڭىزنىڭ چوڭىيىشىغا ئەگىشىپ بارا-بارا ئازىيىپ بارىدۇ، بىراق، سىز بالىلىقىڭىزدىن تارتىپ تاكى قېرىپ ئۆلگىچە شۆھرەتپەرەسلىكتىن ئىبارەت بۇ ئاجىزلىقىڭىز بىلەن توختاۋسىز كۆرۈش قىلىشىڭىز كېرەك.
خۇدا ئاسمان-زېمىننى ياراتتى. بىراق، بىز بۇ ئۇقۇمنى چۈشىنىش شۇنداقلا ئۇنىڭدىن بەختىمىزنى تېپىشقا ئامالسىزمىز. خۇدا ھەم بىزلەرنىمۇ ياراتتى، بەخت-سائادەتنى چۈشەنسۇن، دەپ. بىز بىر پۈتۈنلۈكنىڭ بىر قىسىمى قىلىپ يارىتىلغان ئىكەنمىز، ئاشۇ بىر پۈتۈنلۈك ئۆزىنى سۆيۈشى زۆرۈردۇر.

2-ئاينىڭ 13-كۈنى

 

ئاچكۆزلۈك ۋە بايلىق

ئىنساپ بولسا باي بولماس، باي بولسا ئىنساپ (بولماس).
−چىن ماقالى.
«مېنىڭ باي بولۇشۇم، باشقىلاردىن مېنىڭ ياخشى بولغانلىقىمدىن» دېيىشىدۇ بەزىلەر. «مەن باشقىلاردىن ياخشى، شۇ سەۋەبتىن مەن باي» دېيىشىدۇ شۇنداقلا يەنە بەزىلەر. بەرھەق، بايلارنىڭ خۇدالىق ئالەمگە كىرمىكى ھەقىقەتەن تەس.
سىز شۇنداق بايلىق توپلاڭكى، ھېچكىممۇ سىزدىن ئۇ بايلىقلارنى ئېلىپ كېتەلمىسۇن، ئۇ بايلىقلار سىز قازا تاپقاندىمۇ مەڭگۈ سىز بىلەنلا تۇرسۇن. بۇنداق بايلىقلار سىزنىڭ روھىڭىزدا ساقلىنىدۇ، سۆيگۈ-مۇھەببەتكە تولغان ھاياتتا ساقلىنىدۇ.
يەكدىل، ۋىجدانى ئەركەك كىشى قىستاڭ ھۇجرىدا، نېپىزگىنە گىلەملا سېلىنغان پولدىمۇ تۈن بويى راھەتلىنىپ ئۇخلىيالايدۇ. ئەكسىچە، ئىككى باي ئون ياتاقلىق كاتتا سارايدىمۇ بىر-بىرىگە كۆنەلمەي ئىچى سىقىلىدۇ.
ۋاقىت ئۇزارغانسېرى باي ئاستا-ئاستا نومۇس قىلىشقا، گادايمۇ ئۈمىدسىزلىنىشكە باشلايدۇ.

2-ئاينىڭ 14-كۈنى

 

تەكەببۇرلۇق

كىشىلەر قەدىمكى دەۋر، ھەتتا ئوتتۇرا ئەسىردىمۇ بارچە مىللەتلەرنىڭ ھەممىسى باراۋەر ئەمەس، بەزى مىللەتلەر (ئالايلۇق، پارسلار، گرېكلار، رىملىقلار ياكى فرانسۇزلار) باشقا مىللەتلەرگە قارىغاندا ساپالىق دەپ ئىشىنىشكەن. ئەمدىلىكتە بىز بۇنداق قاراشقا ئىشەنمەس بولدۇق.
پەقەت بالىلارلا ئادەم بىلەن ئادەم ئوتتۇرىسىدىكى ھەقىقىي باراۋەرلىكنى ئىسپاتلاپ بېرەلەيدۇ. چوڭلار بالىلارغا ئادەملەرگە باراۋەر قارىماسلىقنى ئۆگىتىشىدۇ، بۇ جىنايەتتۇر.
مىللەتچىلىك بىر خىل بىر تەرەپلىمە قاراش، ئۇ ئادەم بىلەن ئادەم باراۋەر ئەمەس دېگەن قاراش ئاساسىغا قۇرۇلغان.
باينىڭ ئۆيىدىكى مالاي، خرىستىئان ئەقىدىسىگە زىت، بىمەنە ھادىسىدۇر.
 ئەخلاقنى تەكىتلىگۈچىلەر ئۆز مەسئۇلىيىتىنى ئۆزلىرىنىڭ ئۆيى ياكى دۆلىتى بىلەنلا چەكلەپ قويىدۇ، بىراق، بۇ ئەمەلىيەتتە نەپسانىيەتچىلىكنى تەرغىب قىلىشتۇر. دۆلەت بىلەن ئائىلە ئىنسانىيەت چوڭ چەمبىرىكىدىكى ئىككى كىچىك چەمبىرەكتۇر.

2-ئاينىڭ 15-كۈنى

 


سوتلاش ۋە جازالاش

سىزدىن ئۆچ ئالغان ۋە جازالاپ خورلىغان ياكى سىزگە زىيانكەشلىك قىلغان ئادەم مەلۇم مەنىدىن ئېيتقاندا، خاتا قىلغان بولىدۇ.
توسالغۇ بولغان كىشىلەر ئۈچۈن زوراۋانلىق ئېھتىياجلىق توساققا ئايلىنىدۇ. بىراق، توغان-توسمىلار دەريانىڭ ئېقىنىنى توختىتالمىغاندەك، زوراۋانلىقمۇ ھېس-ھاياجان ئېقىنلىرىنى توسۇپ قالالمايدۇ، ھېس-ھاياجان ئېقىنلىرى بالدۇرراق قويۇپ بېرىلىشنى ئىستەيدۇ.
ھەممىمىزگە ئايانكى، يامانلىقنى يامانلىق بىلەن تۈگەتكىلى بولمايدۇ. ئادەم خاتالىق ئۆتكۈزگەنىكەن، جازاسىنى تارتىشى كېرەك دەپ تونۇساق، بىزنىڭ خاتالىقىمىزغا يەنە ئۈستىلەپ خاتالىق قوشۇلغان بولىدۇ. يامانلىققا يامانلىق قىلىش، بىزنى يامانلىقتىن قۇتۇلدۇرۇپ قالالمايدۇ، ئەكسىچە يامانلىقنى ھەسسىلەپ ئاشۇرىدۇ.
باشقىلارنىڭ يېتەرسىزلىكىنى كۆرۈشىمىز، ئۇلارنىڭ يۈزىدىكى داغنى كۆرگەندەك بىر ئىش. ئەمما، بىز ئۆزىمىزنىڭ يېتەرسىزلىكىنى كۆرەلمەيمىز، چۈنكى، بىز ئۆزىمىزنىڭ ۋىجدان ئەينىكى بىلەن ئۆزىمىزنى كۆزىتىپ باقمايمىز. دېمەك، بىز ھە دېسە باشقىلارنىڭ يېتەرسىزلىكىنى سۆكمىسەكلا، ساغلام، پاك ئادەم بولالايمىز.

2-ئاينىڭ 16-كۈنى

 

زوراۋانلىق ۋە ئۇرۇش

جەمئىيەتنىڭ ئۆزگىرىشى، كىشىلەرنىمۇ ياخشىلايدۇ، بۇ قارىماققا شۇنچىكىم ئاددىي بىر ئىس. شۇڭا بىز ئۆز ئەتراپىمىزدىكى كىشىلەرنى ئامال بار ئۆزگەرتمەكچى بولىمىز، يەنى، مەنىۋى ئۆسۈپ يېتىلىشىمىز ۋە ئىچكى كامالەت ئۈچۈن قانچىلىك ئىجتىھات كۆرسەتكەنلىرىمىزنى ئۇنتۇپ قالىمىز. جەمئىيەتنى ياخشىلاشنىڭ بىردىن-بىر چارىسى سىزنىڭ مەنىۋى ئۆز-ئۆزىڭىزنى مۇكەممەللەشتۈرۈش.
كۆپلىگەن بىر تەرەپلىمە قاراشلار، خاتا ئىخلاس-ئەقىدىلەر، ساختا مۇئامىلىلەر، مەنىسىز رەسىم-قائىدىلەرنىڭ ھەممىسى خۇداغا قانداق ئىخلاس قىلىشنى ئۆگىتىدۇ. يەنە شۇنداق بىر تەرەپلىمە قاراشمۇ باركى، ئۇ بىر قىسىم كىشىلەرنىڭ باشقىلارغا ئۆز قارىشىنى قوبۇل قىلىشىغا مەجبۇر قىلىدۇ، باشقىلارغا قانداق قىلىپ پاك-ھالال ياشاش، نېمە قىلىش كېرەكلىكىنى ئۆگىتىدۇ.
جەمئىيەتنى ئۆزگەرتىش ئۈچۈن ھەر بىرىمىز قەلبىمىزنى تاكامۇللاشتۇرۇشلا كۇپايە قىلمايدۇ، بۇ تاش ئۆينى قايتا سالغاندا تاش پارچىلىرىنى چېقىش ھەم باشقىدىن تىزىپ قويۇشقا توغرا كەلگەندەك، لاي بىلەن ئۇلارنى قوپۇرۇشنىڭ ئورنى بولمىغاندەك ئىش. مەيلى سىز تاشلارنى قايسى تەرزدە قوپارماڭ، لاي ئىشلەتمىسىڭىز ھاۋا بىر ئۆزگەرسىلا، سالغىنىڭىز چاك-چېكىدىن بۆسۈلۈپ كېتىدۇ.
دۇنيانى ياخشىلاش، مۇھەببەت ئارقىلىق زوراۋانلىقنى كونترول قىلىشنىمۇ ئۆز ئىچىگە ئالىدۇ، مۇنۇ بىر نۇقتىنى چۈشىنىشنىمۇ ئۆز ئىچىگە ئالىدۇ: گۈزەل تۇرمۇشنىڭ ئاساسىي زوراۋانلىقتىن قورقۇش ئەمەس، بەلكى سۆيگۈ-مۇھەببەتتۇر.

2-ئاينىڭ 17-كۈنى

 

ئىشلەش ۋە بىكارچىلىق

كىشىلەرنىڭ تۇرمۇشىدىكى ئەڭ زور توسالغۇ: بەزىلەر باشقىلارنى ئۆزى رازى بولغىدەك ئىشلارنى قىلىشقا مەجبۇرلاش. كىشىلەر ھامان بىر كۈنى شۇنى چۈشۈنۈپ يېتىدۇكى، دۇنيادا ئورتاق بىر خىل قانۇنىيەتمۇ بار، ئۇ زوراۋانلىق قانۇنىيىتى ئەمەس، بەلكى كىشىلەرنىڭ ئۆز ئارا بىر-بىرىنى سۆيۈش قانۇنىيىتىدۇر.
−فېلشىت روبېرت دې لامېننەي
ئوغرى-بۇلاڭچىلار ئوغرى-بۇلاڭچىلىق بىلەن ياشايدۇ. ئۇلار داۋاملىق ئوغرى-بۇلاڭچىلىق قىلىۋەرسە، سىز ئۇلارنى ئۆزگەرتكىلى بولمايدۇ، دەپ قارايسىز. ئۇلارنى ئىبادەت ۋە بېشىدا كۆتىرىشلەرمۇ ئەسكى ئىشتىن قول ئۈزۈپ، ياخشى ئىش-ئەمەللەرنى قىلدۇرالمايدۇ. بايلار ۋە ھۇرۇنلارمۇ شۇنداق. ئۇلار ئۆزلىرى ئىشلىمەي، باشقىلارنىڭ ئەمگىكىگە تايىنىپلا ياشايدىكەن، ئۇلارنىمۇ ياخشى ئادەم قىلىپ ئۆزگەرتىپ بولغىلى بولمايدۇ، ئۇلار مەيلى ھەرقانچە ئىبادەت قىلسۇن ۋە خۇدادىن تىلىسۇن.
ئىش تەقسىماتىنى تەشەببۇس قىلغۇچى، ئۆزى ئەڭ يەڭگىل ئىشنى ئېلىۋالىدۇ. بىراق، غەلىتە يېرى شۇكى، ئۇلارنىڭ باشقۇرۇش خىزمىتى جاپالىق ئەمگەك مەشغۇلاتىغا، بەلكى ئۇلار قاچقان جىسمانىي ئەمگەك ئادەمنى ئەڭ ھۇزۇرلاندۇرىدىغان ئىشقا ئايلىنىپ قالىدۇ.
بىكارچىلىق ئەڭ بۈيۈك تالانتنىمۇ يوقىتىدۇ.−مونتاگن

2-ئاينىڭ 18-كۈنى

 

 

ھەقىقەت

بىزنىڭ تۇرمۇشىمىز دىنسىزلاردىنمۇ ئۆتە ئوسال، ھەتتا ناچار. چۈنكى، بىزنىڭ قوبۇل قىلغىنىمىز ساختا ھەقىقەت، ھەرگىزمۇ ھەقىقىي ھەقىقەت ئەمەس.
كىشىلەر كۈنلەرنىڭ بىرىدە، ئۆزلىرىنىڭ بىر خىل «دىنىي جەمئىيەت» تەشكىلاتلىرىنى بەرپا قىلالايدىغانلىقىغا ھۆكۈم قىلىپ، گۇناھتىن نېرى بولالىسا، شۇ ئوخشاش ئىشنى تەشۋىق قىلىدىغان ۋە چۈشەندۈرىدىغان بىر تۈركۈم كىشىلەر پەيدا بولىدۇ. بۇ ئىككى تۈركۈم كىشىلەر بىر-بىرىنى ئۆز ئارا ئەيىبلىشىپ، يالغان-ياۋىداق گەپلەرنى قىلىشىدۇ، ئۇلارنىڭ ھەممىسىلا خاتالىققا يول قويۇشىدۇ.
ھەرقانداق ئاسارەتكە خاتا ئېتىقاد ئاساسىدىكى ئاسارەتتىن ئاسان چىداشلىق بەرگىلى بولىدۇ. مەلۇم مەزھەپ ياكى دىنىي جەمئىيەتنىڭ قۇلىنى ئىگىسى ئۈزۈك-كېسىل قامال قىلىۋالغان بولىدۇ.
بىز تەنقىد تەتبىقلانغان دەۋردە ياشىماقتىمىز، ھەممە نەرسىنى قاتتىق سىناپ-تەكشۈرىمىز ھەمدە باھا بېرىمىز.
ئىككى تۈرلۈك ئادەم ئۆزىنى تەنقىدتىن قاچۇرىدۇ: روھانىيلار مۇقەددەسلىكنى شىپى كەلتۈرۈپ، تەنقىدتىن قاچىدۇ؛ قانۇن چىقارغۇچىلار ھوقۇقنى بانا قىلىپ تەنقىدتىن قاچىدۇ.
−كانت
2-ئاينىڭ 19-كۈنى

 

ساختا ئىلىم

مۈشۈك ياپىلاق زۇلمەت ئىلكىدە كۆرەلىگەن نەرسىسىنى كۈچلۈك يورۇقتا كۆرەلمەيدۇ. كۆپلىگەن ئۆلىما-ئالىملارمۇ شۇنداق. ئۇلار نۇرغۇنلىغان كېرەكسىز، ئۇششاق-چۈششەك بىلىملەرنى بىلىشىدۇ-يۇ، تۇرمۇشقا كېرەكلىك ئەڭ مۇھىم ئىلىم−بۇ دۇنيادا قانداق ياشاشنى بىلمەيدۇ.
كىشىلەر ھەرقانداق ئىشتا خاتا قاراشتىن ساقلىنالمايدۇ، خۇددى شۇنىڭدەك، بۇ دۇنيادا ساختا ئىلىمدىنمۇ ساقلانغىلى بولمايدۇ. بەزى قاراشلار كىشىلەر تەرىپىدىن بىردىن-بىر ھەقىقەت دەپ قارىلىدۇ، بۇ كىشىلەرنىڭ ئېھتىياجى بولماستىن، بەلكى، ئالىملارنىڭ ئۇنى كەم بولسا بولمايدۇ، دەپ قارىۋالغىنىدا. شۇنداق قىلىپ، ئىلىم سەپسەتىگە ئايلىنىدۇ. بىز ياشاۋاتقان بۇ دۇنيادا بۇنداق ئەھۋال ھەمىشە كۆرۈلۈپ تۇرىدۇ.
كاللا قوبۇل قىلغان بىلىمنىڭ ئىقتىدارى ھەرگىزمۇ چەكسىز بولمايدۇ. شۇڭا، سىزنىڭ بىلىمىڭىز كۆپ بولسا پايدىلىق دەپ ئارتۇقچە ئىشىنىپ كەتمەڭ. مۇھىم بولمىغان كۆپ نەرسىلەرنى بىلىش، ھەقىقىي بىلىمنى ئۆزلەشتۈرۈشكە توسالغۇ بولىدۇ.

2-ئاينىڭ 20-كۈنى

 

تىرىشچانلىق

بىراۋ ئۆزىنى ئۆزگەرتىۋاتقان، تاكامۇللاشتۇرۇۋاتقاندا، بەلكىم بۇرۇنقى كونا يولىغا چېكىنىشى مۇمكىن، بىراق ئۇ ھامان ئۆزىنى يەنە ئۆزگەرتىشكە تىرىشچانلىق كۆرسىتىدۇ. ئۇ بەرىبىر ئارقىغا ئاز-تولا چېكىنسىمۇ، ئالدىغا كۆپ ئىلگىرىلەيدۇ. ئۆزىنىڭ مەنىۋى دۇنياسىنى ئۆزگەرتىشكە بەل باغلىغان ئادەم ئاخىرى چوقۇم غەلىبە قازىنىدۇ.
بىز نا توغرا قاراشنى چۆرۈپ تاشلاشقا ھەقلىق، خۇدا بىزنىڭ يېتەرسىزلىكىمىزنى تۈزەتكۈچىدۇر. ئۆزىڭىزدىن باشقا ھېچكىممۇ سىزنىڭ يېتەرسىزلىكىڭىزنى سىزگە ۋاكالىتەن تۈزىتىپ قويالمايدۇ. سىز تاماقنى قول ئۇچىدىلا ئەتكەن، يەنە كېلىپ مەينەترەك ئېتىپ قويغان بولسىڭىز، خۇدا ئىلاھىي قۇدرىتى بىلەن ئۇنىڭغا قول تىقىپ، بىردىنلا ئوخشىتىپ قويىدۇ، دەپ ئۈمىد كۈتمەڭ.
−يوھان رۇسكىن
ئۆزىنىڭ تىرىشچانلىق كۆرسەتمەسلىكى، ئادەمنى خاتالاشتۇرمايدۇ دېيىش، خاتادۇر. بۇ، ئۆزىنى ئادەم ئەمەس، بەلكى ھايۋان ياكى جانسىز ئورگانىزم ئورنىدا كۆرگەنلىك. ئىنسانلار، بىزنىڭ تىرىشچانلىق كۆرسىتىشكە قۇربىمىز يېتىدۇ، دەپ چۈشىنىدۇ.
ھەر خىل دىنلار بىزنى يېتەكلەيدۇ: بىزنىڭ پۈتكۈل ھاياتىمىز، بىزنىڭ ئەڭ دەسلەپكى ھايۋان تۇرمۇشى باسقۇچىدىن ئەڭ بۈيۈك روھىي تۇرمۇش باسقۇچىغا ئۆتكىچە جەرياننىڭ ئۆزى بىر خىل تىرىشچانلىق كۆرسىتىشتۇر.

2-ئاينىڭ 21-كۈنى

 

دۇنيادا گۇناھ يوق

كىشىلەر ئۆزى ئۈچۈن بايلىق، خۇشاللىق ئىزدەشكە تىرىشىدۇ، ياكى ئۆزى ئۈچۈن تالاش-تارتىش قىلىشىدۇ؛ بىراق، ئۇنىڭدىكى ئازغىنە تىرىشچانلىقنى ھەركىم ئۆزىدىكى ۋىجدانغا قارشى تۇرۇشقا ئەمەس، ئۆزىنىڭ ئۆزلۈكىنى يېڭىلاشقا ئىشلەتسە، بۇ دۇنيادىكى جىمى يامانلىق، گۇناھى كەبىرلەر ئوڭايلا يوقالغان بولاتتى.
ئۆزىڭىز سۆيگەن ئادەملەر قىلىپ سالغان ئەسكى ئىشلىرىنى يېيىپ يۈرمەڭ ياكى ئاغرىنماڭ. باشقىلار سۆز-چۆچەك قىلىشسا، باھا بېرىشسە ياكى ھەقەمسايىلىرىڭىزنى تەنقىد قىلىشسا، بىلىپ-بىلمەي قوشۇلۇپ قالماڭ. باشقىلارنىڭ يامان گېپىنى قانچە ئاز قىلسىڭىز، سىزگە شۇنچە پايدىلىق. سىز بۇ دۇنيالىق ياخشى ئىشلارنى كۆپەيتەلمەيسىز. سىزنىڭ ھايات تۇرۇشىڭىزنىڭ ئۆزىلا ياخشى بىر ئىش. سىزنىڭ قىلىدىغىنىڭىز، ئۇنىڭغا زىيان سالماسلىقلا-خالاس. بىز بەزىدە ھەقىقەتەن بەك مەنىسىز ياشايمىز، بىراق، بۇ ئەسلى قىلىشقا بولمايدىغان يامان ئىشلارنى قىلىپ سالغانلىقىمىزدىندۇر.
«Aut bene, aut nihil» بۇ جۈملىنى «ئۆلگۈچىگە نىسبەتەن ياخشى گەپ بولسا دېگۈلۈك، ياكى زۇۋان سۈرمەي جىم تۇرغۇلۇق» دەپ چۈشىنىلسە، بۇ خاتا بولغان بولىدۇ. سىز بۇنىڭ ئەكسىچە مۇنداق دەڭ: «ھاياتلارغا نىسبەتەن ياخشى گەپ بولسا دېگۈلۈك، ياكى زۇۋان سۈرمەي جىم تۇرغۇلۇق». شۇنداق قىلغاندىلا بىزنىڭ سەۋەنلىكىمىزنىڭ ئالدىنى ئالغىلى، ياخشىلىق بىلەن يامانلىقنىڭ پەرقىنى ئايرىۋالغىلى بولىدۇ.

2-ئاينىڭ 22-كۈنى

 

ئىدىيە

سىز رېئاللىقتىكى گۇناھ، ئېزىقىش ۋە يالغان-ياۋىداق گەپلەرنى يوقىتىپ بولالمايسىز. پەقەت ئۇلارنى ئۆز ئىدىيىڭىزدىلا يوقۇتالايسىز.
بىز داۋاملىق بۇ دۇنيانى ئالغا سىلجىتىدىغان مەنىۋى قۇدرەتكە دىققەت قىلمايمىز. كىتاب، گېزىت، قانۇن ۋە ئىلمىي ژۇرنالدىن ئۇنى ئىزدەپمۇ تاپالمايمىز. ئۇ شەكىلسىز، ئەزەلدىن ئەركىن. سىز ئۆز ئىدىيىڭىزدىن ئۇنى تاپالايسىز، ئۇ سىزنىڭ مەنىۋى قۇدرىتىڭىزدۇر.
بۇ دۇنيا خۇسۇسىدا پىكىر يۈرگۈزگەندە، دەسلەپ سىز قەلب سادالىرىڭىز ئارقىلىق سۆزلەڭ، پەقەت شۇنداق قىلىش ئارقىلىقلا سىز ئاندىن باشقىلارغا سۆزلەشكە ھەقلىق.
ھاياتقا دائىرە بەلگىلەش، كىشىلەرنىڭ ئىش-ھەرىكىتىگە ئاساسەن بولماستىن، بەلكى ئۇ ئىش-ھەرىكەتكە يېتەكچىلىك قىلىۋاتقان ئىچكى ئىدىيىگە ئاساسەن بولىدۇ؛ پۈتكۈل بىر دۆلەت دائىرىسىنى بەلگىلەشتىمۇ شۇنداق دېيىشكە بولىدۇ. ھەرقايسى دۆلەتلەرنىڭ دائىرىسىنى بەلگىلەشتە، ئۇنىڭ تاشقى ھادىسىلىرىگە ئەمەس، بىر پۈتۈن خەلقنىڭ ئورتاق ئىدىيىسىگە ئاساسلىنىدۇ.
روھنى ماكان تۇتقان بۈيۈك ئىدىيىلەر ئادەمنىڭ پۈتكۈل ھاياتىنى ئۆزگەرتەلەيدۇ.

2-ئاينىڭ 23-كۈنى

 

ھەقىقەت

بىراۋلارنىڭ ئېغىزدىكى گەپ-سۆزىگە قاراپلا ھەرقانداق ئىشىغا ئىشىنىۋېرىشكە بولمايدۇ. ئاۋۋال ھەممىنى ئويلۇنۇڭ ۋە ئانالىز قىلىڭ، ئاندىن سىزنىڭ ئەقىل-ئىدرىكىڭىز ئىسپاتلىغان ئىشلارنىلا ئېتىراپ قىلىڭ.
پاك، ھالال ياشاش ئۈچۈن ھەقىقەتكە تايىنىش كېرەك، بۇرۇنقى ئاقىللار ئۇ يەردىن يېتەكلىنىشنى ئىزدىگەن.
سىز ئەقلىي كۈچىڭىزنى ئىشقا سالسىڭىزلا ھەقىقەت سىزنى تاپىدۇ.
ئەگەر، ھەقىقەتنى چۈشەنمەك بولسىڭىز، ئاۋۋال شەخسكە پايدىلىق بارچە ئىدىيىلەردىن قۇتۇلۇپ، ئاندىن ھۆكۈم قىلىڭ.
ھەقىقەتنى چۈشىنىشكە ئىنتىلگەن ھەر بىر كىشى ماڭا دېھقاننى ئەسلىتىدۇ. ئۇنىڭ ئاساسلىق تاللىشى ھەقىقەت، دېھقاننىڭ ئەڭ ياخشى ئۇرۇقنى تاللىغىنىدەك، بۇ ھەقىقەت ئۇرۇقىنى تېرىيدۇ، دېھقان تۇپراققا ئۇرۇق سالغاندەك. ئاغزاكى گەپ-سۆزلەر سىزنىڭ ئاساسلىق قورالىڭىزدۇر.

2-ئاينىڭ 24-كۈنى

 

كەمتەرلىك ۋە كىچىك پېئىللىق

ھەقىقىي پەزىلەت ئىگىلىرى ئۆزىنى ئېسىل پەزىلەتلىك ئادەم دەپ قارىمايدۇ. چۈنكى، ئۇلار پەزىلەتكە ئىگە ئادەملەردۇر.
ھەقىقىي پەزىلەت ئۆزىدىن سۆز ئاچمايدۇ، ئۆزىنى كۆز-كۆز قىلمايدۇ. ساختا پەزىلەت ئۆزىنى ھەممە يەردە كۆز-كۆز قىلىشقا، ئۆزىنى ئۇچۇرۇشقا موھتاجدۇر.
ئەخلاقىي پەزىلىتى ياخشى، كىچىك پېئىل، ئەمما ئەقىللىق كەلگەن ئادەم ئاشۇ ئۆزى ناخشا ئېيتىپ ئۆزى دۇمبىقىنى چالىدىغان پەزىلەتسىزلەرگىمۇ ھۆرمەتسىزلىك قىلمايدۇ. بۇ شۇنىڭ ئۈچۈنكى، كىچىك پېئىل، ئەقىللىق ئادەم باشقىلارنىڭ قانچىلىك ئىكەنلىكىنى كۆڭلىدە دەڭسەپ بولىدۇ، ھاماقەت ئوي-خىياللىرىنى ئۆزىگە شۇنداق ئىشەنگەن ھالدا سۆزلەپ يۈرمەيدۇ.
كەمتەرلىك بارچە ئېسىل پەزىلەت ۋە ئەقىل-پاراسەتنىڭ ئاساسى. ئۆزىنى كىچىككىنە بىر قورۇت-قوڭغۇز، بىر زەررە، بىر يوقلۇق دەپ قاراشتىنمۇ پايدىلىق ئوي-پىكىر مەۋجۇت ئەمەس.
مۇبادا، سىز ئۆزىڭىزنى بۈيۈك ئەمەس، ئاددىيلا بىر ئادەم دەپ قارىسىڭىز، ئۆلۈممۇ ئالدىڭىزدا قورقۇنچلۇق نەرسە بولماي قالىدۇ، بەلكى ھاياتنىڭ ھەقىقىي خۇشاللىقىغا نائىل بولالايسىز.

2-ئاينىڭ 25-كۈنى

 

ئۆزىنى قۇربان قىلىش

سىز ئۆز تېنىڭىزگە قانچىكى دىققەت قىلمىغانچە، ئۆزىڭىزنىڭ روھىي تۇرمۇشىدىن ئېرىشىدىغىنىڭىز شۇنچىكى كۆپ بولىدۇ. سىز ئۆزىڭىزگە ئەڭ كېرەكلىك نەرسىنى تاللىۋېلىڭ.
مەڭگۈ توختاپ قالماي داۋام قىلىدىغان بىردىن-بىر ئىش، باشقىلار ئۈچۈن ياشاش. باشقىلار ئۈچۈن ياشىغاندا، سىزنىڭ ھاياتىڭىز خۇشال ھەم تىنچ-خاتىرجەم ئۆتىدۇ.
سىز ھەقىقىي ئېتىقادقا ئىگە بولۇش ئۈچۈن ئۆزىڭىزدىن ۋاز كېچىشكە توغرا كېلىدۇ. ئۆزىڭىزدىن ۋاز كېچىش ئۈچۈن ئېتىقادقا موھتاج بولىسىز. بۇ ئىككىسى بىر-بىرىنى تولۇقلايدۇ.
ۋاقىت ئاققان سۇدەك ئۆتۈپ كېتىۋېرىدۇ، بىراق، «ئادەم قانداق بولغاندا ھالال-پاك ياشىغىلى بولىدۇ» دېگەن بۇ سىر ئاخىرغىچە يېشىلمەيدۇ−ئەمما، ئۇ ئەمەلىيەتتە بۇرۇن-بۇرۇنلا ئاللىقاچان يېشىپ بولۇنغان.
ئادەم مەنىۋى تۇرمۇشى ئۈچۈن ئۆز ئىختىيارلىقى بىلەن جىسمانىي تۇرمۇشىنى قۇربان قىلمىقى زۆرۈردۇر.

2-ئاينىڭ 26-كۈنى

 

ھازىردا ياشاش

سىزنىڭ مۇشۇ ھازىر ئىچىدە ياشىشىڭىز خۇدانىڭ بىز بىلەن بىللە تۇرۇۋاتقان پەيتىدۇر. شۇڭا، سىزنىڭ كۆز ئالدىڭىزدىكى بىر مىنۇت ۋاقىتمۇ ھەرقانداق نەرسىدىن قىممەتلىك. سىز بۇ ۋاقىتنى ئىسراپ قىلىۋەتمەسلىكىڭىز ئۈچۈن پۈتۈن كۈچىڭىز بىلەن تىرىشىڭ، ئۆز قەلبىڭىزدىكى خۇدانىڭ بېشارەتلىرىنى ئىنچىكىلەپ كۆزىتىڭ.
ياشىغانسېرى مېنىڭ زېھنىممۇ ئېچىلىدۇ. غەلىتە يېرى شۇكى، كۆز ئالدىمغا ياخشى، گۈزەل نەرسىلەرلا كېلىدۇ. گاھىدا، بۇ كەچمىشلەرنىڭ ماڭا بەخش ئېتىدىغان شادلىقى ھەتتا كۆز ئالدىمدىكى ئەمەلىي خۇشاللىقلاردىنمۇ ئېشىپ كېتىدۇ. بۇ نېمىدىن دېرەك بېرىدۇ؟ ھەممىنىڭ يوقالماسلىقىدىن دېرەك بېرىدۇ. بۇرۇن مەۋجۇت بولمىسا، كەلگۈسىدىمۇ مەۋجۇت بولمايدۇ، چۈنكى، ھەممە نەرسە مۇشۇ زامان، مۇشۇ ماكاندا، ھەممىسى كۆز ئالدىڭىزدىلا مەۋجۇت بولۇپ تۇرىدۇ.
ئەگەر، سىز كۆز ئالدىڭىزدىكىنى سۆيۈپ ياشايمەن دېسىڭىز، كەلگۈسى ھاياتىڭىزغا ياكى ئۆلگەندىن كېيىنكى ھاياتقا گۇمان بىلەن قارىمايدىغان بولىسىز.

2-ئاينىڭ 27-كۈنى

 

تىرىشچانلىق
 
بىز ئۆزىمىزنىڭ ھايۋانىي مەۋجۇدىيىتىمىزنى روھىي مەۋجۇدىيەتكە ئايلاندۇرۇشىمىز، رەزىللىك بىلەن كۆرۈش قىلىشىمىز زۆرۈر. ئۆزىمىزنىڭ دىشۋارچىلىق، بەختسىزلىك ۋە ئازاب-ئوقۇبەتلىرىمىز ئۈستىدىن غالىب كەلگەندىلا ئاندىن پىشىپ يېتىلىمىز، ئۆزىمىزنىڭ روھىي ئۆزلۈكىگە تېخىمۇ يېقىنلىشالايمىز.
تۇرمۇشتا تەلەيلىك كىشى باي، ساغلام بولسىمۇ ئادەتتىكى قىيىنچىلىق-دوقاللارغا دۇچ كەلمەيدۇ، ئۇلار ھامان بۇزۇلۇپ ياكى ئىرادىسى ئاجىزلاپ كېتىدۇ، دېيىشىدۇ كىشىلەر. بۇنىڭدىن سىز ئادەم ياشاش داۋامىدا نېمە ئۈچۈن تىرىشچانلىق كۆرسىتىش، ھەر خىل قىيىنچىلىقلارنى يېڭىش كېرەكلىكىنى بىلەلەيسىز. بىز مۈشكۈلاتتىن زارلاپ يۈرمەي، ئۇنىڭ ئۈستىدىن غالىب كېلىشىمىز كېرەك.
ئادەم خۇدا روھىنىڭ بىر قىسىمى، خۇدانىڭ روھى ئادەمنىڭ جىسمىنى ئوراپ تۇرىدۇ. ھاياتنىڭ دەسلەپكى مەزگىلىدە ئادەم بۇنى ئويلاپ يېتەلمەيدۇ، ئۇ پەقەت ئۆز ھاياتىنىڭ تەننى ئاساس قىلىدىغىنىغىلا ئىشىنىدۇ. ئادەمنىڭ ھاياتى ئۇزارغانچە ئۆزىنىڭ ھەقىقىي ھاياتى تەننى ئەمەس، روھنى ئاساس قىلىدىغىنىنى چۈشىنىپ يېتەلەيدۇ.
ئەگەر، سىزنىڭ دۈشمىنىڭىز بولسا، ئۇنى قانداق كۆچۈرۈشنى ۋە ئۆز دۈشمىنىڭىزنىمۇ سۆيۈشنى ئۆگىنىۋېلىشىڭىز كېرەك. شۇنداق بولغاندا، سىزنىڭ ئېرىشىدىغىنىڭىز، دۈشمىنىڭىزنى كەچۈرمىگەندىكىگە قارىغاندا تېخىمۇ كۆپ بولىدۇ.

2-ئاينىڭ 28-كۈنى


ئۆلۈم

ئەگەر، ھايات بىر مەيدان چۈش كۆرۈش بولسا، ئۆلۈم-مامات چۈشتىن ئويغىنىش، ئانداقتا كەلگۈسىدىكى چۈشۈمگە نىسبەتەن ئۆزۈمنى باشقا بىر خىل مەۋجۇدىيەت دەپ قاراشقا بولىدۇ.
ئىنسانلارمۇ ھايۋانلارغا ئوخشاشلا ئۆلۈمگە قارشىلىق كۆرسەتسىمۇ، بىراق، ئادەمدە ئەقلىي ئىقتىدار مەۋجۇت، ئادەم ئۆلۈمگە قارشىلىق كۆرسىتىپ تۇرسىمۇ، ئادەمنىڭ ئۆلمىكى بەرھەق، دەپ قارايدۇ.
ھەر بىر كىشىنىڭ ھاياتى ھەددى-ھېسابسىز ئۇششاق ئۆزگىرىشلەردىن تۈزۈلگەن، بىز ئاددىي كۆز بىلەن ئۇلارنى كۆرەلمەيمىز، ئۇلار ھەر مىنۇت بىزنىڭ ۋۇجۇدىمىزدا رۇي بېرىپ تۇرىدۇ. بۇ ئۆزگىرىشلەرنىڭ دەسلىپىدە بىز تېخى كىچىك بالا، ئۆزگىرىشلەرنىڭ ئەڭ ئاخىرىدا بولسا ئۆلۈم بىزگە يېپىشقان بولىدۇ. ھالبۇكى، ئۆلۈمنى بىز چۈشىنىشكە قادىر ئەمەسمىز. ئۆلۈم شەكىللەرنىڭ ئۆزگىرىشى، بىزنىڭ روھىمىز مۇشۇ شەكىللەرگە ئولتۇراقلاشقان، بىز شەكىل بىلەن مەزمۇننى ئارىلاشتۇرۇۋەتسەك بولمايدۇ.
بىزنىڭ ھاياتىمىز، تەۋەللۇت بولغاندىن تاكى ئۆلگىچە قەدەر بىزنىڭ چۈشىمىز−بىز ھەقىقىي ھايات دەپ قارىغان بىر مەيدان ئۇزۇن چۈش−نىمۇ ئۆز ئىچىگە ئالىدۇ. ھالبۇكى، ئۇنىڭدىنمۇ بۈيۈك ھايات بىزنى تېخى ئالدىمىزدا ساقلاپ تۇرامدۇ؟

2-ئاينىڭ 29-كۈنى

كۈنىگە بىر ئەقىل (باھارنامە) 3-ئاي

ئېتىقاد

ھەر بىر ئادەم ئۆز قەلبىدە مەلۇم ئۇلۇغۋار نەرسىلەرنىڭ مەۋجۇتلۇقىنى، ئۇنى چۈشەندۈرۈپ بېرەلمىسىمۇ، ھەممىدىن مۇھىملىقىنى ھېس قىلىپ تۇرىدۇ. بىر ئادەمنىڭ ئۇنىڭغا بولغان پوزىتسىيىسى دىندۇر.
دىننىڭ پەرھىزلىرى تولىمۇ ئېنىق ۋە ئاددىي، كىشىلەر ئۇنى بىلمەيمەن دەپ سەۋەب كۆرسەتكۈدەك يوچۇق قالدۇرۇلمىغان.
قەۋم ئىچىدە بىر مۇپتى بار ئىدى، ھەزرىتى ئەيسانى سىناپ كۆرمەك بولۇپ، ئۇنىڭدىن سورىدى: «ئۇستاز، ئەمەل قىلمىساق بولمايدىغان ئەڭ چوڭ پەرھىز قايسى؟» ھەزرىتى ئەيسا ئۇنىڭغا ئېيتتىكى: «پۈتكۈل ۋۇجۇدىڭىز، پۈتكۈل نىيەت-ئىقبالىڭىز بىلەن رەببىمىزنى سۆيمەك. مانا بۇ پەرھىزلەرنىڭ بىرىنچىسى، شۇنداقلا ئەڭ چوڭىدۇر. ئۇنىڭدىن قالسا، بەندىلەرنى سۆيۈڭلار، دېگىنى. بۇ ئىككى پەرھىز دىنىمىز ئەھكامى ۋە پەيغەمبەرلىرىمىز ئەمەل قىلىدىغان ئومۇمىي قائىدە-يوسۇنلاردۇر.»
−«ماتتې ئىنجىلى» 22-پارە، 35-40 سۈرە
چىن ئېتىقاد ئاتا قىلغان ئەقلى ئىقتىدارنىڭ قۇدرىتى، ھەر خىل ئېتىقادلارنىڭ ئاساسىدۇر. خۇدانى تۇيۇشتىن ئىبارەت شۇ خىل ئەقلىي قۇدرەت تۆۋەن مۆلچەرلەنسە، خۇداغا ھەقىقىي ئىشىنەلمەيسىز.

3-ئاينىڭ 1-كۈنى


روھ

قۇرت-قوڭغۇزغا سېلىشتۇرغاندا ئادەم ئاڭلىق كېلىدۇ، ئۆزىنىڭ بۈيۈك ۋە مۇھىملىقىنى ھېس قىلالايدۇ. بىراق، يەر شارىنىڭ چوڭلۇقىغا سېلىشتۇرغاندا، ئادەم ئۆزىنىڭ تولىمۇ كىچىك، ئاجىزلىقىنى ھېس قىلىدۇ. قۇياشقا سېلىشتۇرغاندا، يەر شارى كىچىك بىر زەررىدىن باشقا نەرسە ئەمەس. باشقا غايەت زور يۇلتۇزلارغا سېلىشتۇرغاندا، قۇياش يەنىلا كىچىك. بېشىمىزدىكى قۇياش ۋە يۇلتۇزلارغا سېلىشتۇرغاندا، ئادەمنىڭ جىسمى قانچىلىك؟ ھېچقانچە ئەمەس.
كىشىلەر بەزىدە: «سىز خۇدانى ئۇنتۇپ كەتتىڭىزمۇ؟» دەپ سورىشىدۇ. بۇ ياخشى سورالغان سوئال. خۇدانى ئۇنتۇش، سىزنىڭ ئۆز ئىچىڭىزدە باشتىن-ئاخىر مەۋجۇت بولغان ئۇ بىرسىنى ئۇنتۇپ قالغىنىڭىزدىن دېرەك بېرىدۇ. خۇدانى ئەستە چىڭ تۇتۇش، راستتىنلا چەكسىز چوڭ ئىش−خۇدانى ياد ئېتىڭ، بىراق ئېغىزدىلا ئەمەس، ھەر ۋاقىت خۇدانىڭ باشتىن-ئاخىر بىز بىلەن بىللە ئىكەنلىكىنى ئەستە تۇتۇڭ.
مۇبادا، سىز ئۆزىڭىزنى روھىي مەۋجۇدىيەت دەپ بىلسىڭىز، ئۆزىڭىزنى بارچە ئازابلاردىن ئازاد قىلالايسىز. مەيلى سىز قانچىلىك بەختسىزلىككە يولۇقماڭ، قەلبىڭىز يارىلانمايدۇ.

3-ئاينىڭ 2-كۈنى

 

بارلىق جانلىقلارنىڭ روھى بىر

ئادەم تېنىگە ئەمەس، روھىغا تايىنىپ ياشايدۇ. سىز بۇ نۇقتىنى چۈشىنىپ يەتكىنىڭىزدە، كۈللى جانلىقلار بىلەن ئىناق ئۆتۈشتەك بىر خىل تۇيغۇنى ھېس قىلىسىز.
يەر شارىمىزدا ئۆز روھىمىزنىڭ مەنبەسىنى تاپالمايمىز، ئۆتمۈش ئەسلىمىلىرىدىنمۇ ئۇنى تاپالمايمىز، كەلگۈسىمىزدىنمۇ شۇنداق. بىز ماددىي دۇنياغا ئوخشىمايمىز−بىزدە روھ-مەنىۋىيەت بار.
ئېسىل پەزىلەت يېتىلدۈرەي دېسىڭىز، بارچە جانلىقلارغا ھېسداشلىق قىلىڭ. سىز: «ئۇ پەزىلەتلىك بولغان بىلەن ھېسداشلىق قىلىشنى بىلمەيدۇ» دېسىڭىز بولمايدۇ، شۇنداقلا «مۇنۇ كىشىدە ھېسداشلىق بولغان بىلەن بەك رەھىمسىز-ياۋۇز» دېسىڭىزمۇ بولمايدۇ. بۇنداق دېيىش، بىمەنە.
باشقىلار بىلەن ماسلىشىش ئۈچۈن سىز ئۆزىڭىز بىلەن مۇناسىۋەتسىز ئىشلارنى ئەمەس، بەلكى مۇناسىۋەتلىك ئىشلارنى چوڭقۇر ئويلىنىڭ.

3-ئاينىڭ 3-كۈنى

 

خۇدا

قىشنىڭ ئوچۇق كېچە ئاسمىنىغا ئۈمىد بىلەن باققىنىڭىزدا، دانە-دانە چاراقلاپ تۇرغان بىساناق يۇلتۇزلارنى كۆرەلەيسىز. ئەگەر، سىز ھەر بىر يۇلتۇزنىڭ يەر شارىدىن نەچچە ھەسسە چوڭلۇقىنى، بۇ يۇلتۇزلارنىڭ ئارقىسىدا مىڭلىغان (ھەتتا، مىليونلىغان) تېخىمۇ چوڭ يۇلتۇزلارنىڭ ساقلىنىپ تۇرغىنىنى، ئاسماننىڭ چەكسىزلىكىنى چۈشىنىپ يەتسىڭىز، سىز ھەتتا ئاسماننى بىلىپ بولمايدىغانلىقىنى ھېس قىلىسىز. مانا بۇ سىز ئېيتىدىغان خۇدانىڭ قۇدرىتى.
كىشىلەر ئۆزىنىڭ ئارقىسىدا يەنە بەزى شەيئىلەرنىڭ مەۋجۇتلۇقىنى ئىختىيارسىز ئويلاپ يەتكىنىدە، ئۆزىنىڭ مەلۇم ئادەملەر نىشانىغا يېتىدىغان ۋاسىتە-قورال ئىكەنلىكىنى ئاڭقىرالايدۇ.
خۇدا مەڭگۈلۈكتۇر، ئۇ ماكان-زاماندىن ھالقىپ ھەممىنى ئۆز قوينىغا ئېلىپ تۇرىدۇ. خۇدا پۈتكۈل بولۇملاردۇر. كۈللىيات خۇدا ۋۇجۇدىدا مەۋجۇت بولۇپ تۇرىدۇ. بۇ خۇدادىن ئۆزگە يەنە بىر خۇدا مەۋجۇت ئەمەس. جىمىكى نەرسىلەر خۇدا ۋۇجۇدىدا مەۋجۇت بولۇپ تۇرىدۇ. بارچە ھاياتلىق پەيدا بولغاندا، يوقلۇقتىن بار بولۇپ قالغان ئەمەس، بەلكى ھەممىسى خۇدادىن تۆرەلگەن. ئەزرائىل بىزنى ئېلىپ كەتكەندە، بىزنى يوقلۇققا ئېلىپ كەتمەيدۇ، بەلكى بىزنى خۇدانىڭ ئالدىغا قايتۇرۇپ كېلىدۇ.

3-ئاينىڭ 4-كۈنى

 

روھنىڭ بىردەكلىكى

سىز ئىككى خىل ئۇسۇلدا ئۆزىڭىزنىڭ ھاياتىنى چۈشىنەلەيسىز. بىر خىلى، ئۆزىڭىزنىڭ ئەڭ مۇھىم ئادەم ئىكەنلىكىگە ئىشىنىش، باشقا بارچە كىشىلەر، ھايۋاناتلار، جانلىقلارنى ئۆزىڭىزدىن كېيىنكى ئورۇنغا قويۇش: ئۇلار پەقەت سىزنىڭ ئەتراپىڭىزدىلا مەۋجۇت. سىز مانا شۇ تەرزدە ياشاۋاتقىنىڭىزدا، باشقا ھاياتتىن غەزەپلىنىسىز.
بىراق، ئۆزىڭىزنىڭ ھاياتىنى چۈشىنەلەيدىغان يەنە بىر خىل ئۇسۇل: كىشىلەر خۇددى سىزگە ئوخشاشلا ھايات كەچۈرىدۇ، سىز باشقا بارچە ھايات بىلەن تامامەن بىردەكلىككە ئىگە بولىسىز. شۇندىلا، سىزنىڭ كۆڭلىڭىز ئارام تاپىدۇ، سىزنىڭ روھىڭىزمۇ ئەركىن-ئازادىلىككە ئېرىشىدۇ.
«ئىچ پۇشۇقى ۋە تەنھالىق ئازابى چېكىۋاتىمەن» دەرسىز كۈنلەرنىڭ بىرىدە ئېھتىمال. شۇغىنىسى، سىز ئۆزىڭىزنى «مەن» دەپ ئاتالغان بۇ تۈرمىگە قاماپ قويغىنىڭىزدا، كىممۇ سىزگە ئەتراپىڭىزدىكى ئۆزىڭىز ئۇنتۇغان ئاشۇ ھادىساتلارنى ئېيتىپ بېرەلىسۇن؟
ئۆزىڭىزنى روھىي مەۋجۇدىيەت، كۈللىيات بىلەن ئىجىل-ئىناق مەۋجۇـ
ـــــــــــــــــــ
دىيەت دەپ قارىغىنىڭىزدىلا ئاندىن ھاياتىڭىزنى كەمكۈتسىز، مۇكەممەل ياشىيالايسىز.

3-ئاينىڭ 5-كۈنى

 

سۆيگۈ-مۇھەببەت

بىز تۇرمۇشىمىزنى بىر-بىرمىزدىن قېلىشقۇسىز ئۆزگەرتىمىز، بىراق، پۇل-پۈچەك، سوغا-سالام، تەنبىھ-نەسىھەتلەرگە ئەمەس، سۆيگۈ-مۇھەببەتكە تايىنىپ ھاياتىمىزنى ئۆزگەرتەلەيمىز.
خۇدا سۆيگۈدۇر، شۇڭا كىشىلەر خۇدادىن قورقماسلىقى كېرەك. كىشىلەر قانداقسىگە سۆيگۈدىن قورقىشىدۇ؟ خۇدانى سۆيگەندە، دۇنيادىكى ھېچنەرسىدىن قورقمايدىغان بولىمىز.
خۇدا ئاسمان-زېمىننى ياراتتى، ئەمما، ئاسمان-زېمىننىڭ مەۋجۇتلۇقىدىن خۇشاللىق تاپالمىدى. شۇنىڭ بىلەن خۇدا بۇ خۇشاللىقلارنى بايقىيالايدىغان، ئىدىيە-قاراشقا ئىگە جانلىقلارنى ياراتتى. بىز مانا شۇ بىر پۈتۈن گەۋدە سۈپىتىدە يارىتىلغانمىز، بۇ بىر پۈتۈن گەۋدە ئۆزىنى سۆيۈشى شەرت.
سۆيگۈ−مەلۇم بىرىگىلا بولغان سۆيگۈ ئەمەس، بەلكى پۈتكۈل ئىنسانلارغا بولغان مەنىۋى سۆيگۈ−بىزنىڭ قەلب كۆرۈنىشىمىز، بىز ئۆز روھىيىتىمىزنى چۈشەنسەك، ئۆز روھىمىزنى چۈشىنەلەيمىز.

3-ئاينىڭ 6-كۈنى

 

گۇناھ

بىز بىر ئۆمۈر گۇناھ، ئېزىقىش، بىر تەرەپلىمە قاراشلار بىلەن كۈرەش قىلىمىز.
ئادەمنى ئازبلايدىغان بەش تۈرلۈك گۇناھ مەۋجۇت: ئاچكۆزلۈك، ھۇرۇنلۇق، شەھۋانىيلىق، غەزەپلىنىش ۋە ئاداۋەت ساقلاش، ئۇلاردىن باشقا يەنە تەكەببۇرلۇق.
بىزنىڭ جىسمىمىز ئۆز ئارا ئايرىلمايدۇ دېسەك، قەلبىمىزدىكى مۇقەددەس روھمۇ ئىناق بولىشى كېرەك. تەن بولمىسا ھايات بولمايدۇ، بىراق، تەندىن سىرت يەنە باشقا بىر خىل ھاياتمۇ مەۋجۇتتۇر.
تۈرلۈك گۇناھ-خاتالىقلار بىلىمسىزلىك-نادانلىقتىن كېلىدۇ.
ئەگەر سىز ھاياجان ۋە ئاچچىقتىن خالاس بولۇپ، ئۆزىڭىزگە زىيانكەشلىك قىلغان ئادەمنى ئەپۇ قىلىۋېتىپ، كەمكۈتسىز ياشىسىڭىز، ئۇنداقتا سىز بىر ئادەمنىڭ قولىدىن كېلىدىغان ئەڭ چوڭ ئىش-ئەمەللەرنى قىلغان بولىسىز.

3-ئاينىڭ 7-كۈنى

 

ھاۋايى-ھەۋەس ۋە شەھۋانىي ھېسسىيات

جىسمانىي تۇرمۇش، جۈملىدىن كۆپىيىش جەھەتتە ئادەم ھايۋاندىن تۆۋەن تۇرماي، ئۈستۈن تۇرۇشى كېرەك. ھايۋانلارنىڭ جۈپلىشىشى، نەسىل قالدۇرۇش ئۈچۈندۇر. ئەر بىلەن ئايالنىڭ بىرىكىپ جىنسىي مۇناسىۋەت قىلىشى، بەخت ھۇزۇرىنى سۈرۈشى ئۈچۈندۇر، بۇ چاغدا پەرزەنت ئىشى ئۇلارنىڭ ئۇخلاپ چۈشىگىمۇ كىرمەيدۇ.
بىر جۈپلەرنىڭ جىسمانەن يېقىنچىلىق قىلىشىدا، بالا ئىشىنى ئورتاق ئويلاشمىسا، مانا بۇ گۇناھ قىلغانلىقتۇر.
ئادەم ۋۇجۇدىدا شەھۋەتتىن ئىبارەت بۇنداق بىر گۇناھ مەۋجۇت بولغاچقىلا ئۇ تەسەۋۋۇر بوشلۇقىمىزدا يامرايدۇ. سىز ئامالنىڭ بارىچە بۇنداق غەيرى ئوي-خىياللاردىن قۇتۇلۇپ، ئۆزىڭىزنىڭ مەنىۋى ئىچكى مەۋجۇتلۇقىڭىزنى ئەستە چىڭ تۇتۇڭ.
كېيىنكى ئەۋلادلارنى يېتىشتۈرۈش ياخشى ئىش-ئەمەل جۈملىسىدىنمۇ-ئەمەس، بۇنى بىز بىلمەيمىز. ئەمما، دۇنيانى ياراتقۇچى ئىگىمىز بۇنى بىلىپ تۇرغۇچىدۇر. بىز شەھۋەتتىن ئۆزىمىزنى چەكلەش پەزىلىتىگە مۇخالىپ ھالدا شەھۋەت گۇناھىغا پاتقىنىمىزدا، بۇ نۇقتىنى ئەستە چىڭ تۇتىشىمىز كېرەك.

3-ئاينىڭ 8-كۈنى

 

ئېزىقىش

تەننىڭ ھاياتلىقىنى ساقلاپ قېلىشنىڭ ھەقىقىي ئېھتىياجىغا نىسبەتەن سىز ھامان شۇنداق ھۆكۈم قىلالايسىز: كىيىم-كېچەك، شۇنداقلا يېيىشكە بولىدىغان بىر بۇردا نان. بىراق، سىزنىڭ تېنىڭىزنىڭ ئارزۇ قىلىدىغىنى بارغانچە كۆپىيىپ، چېكى يوق ھالغا كېلىدۇ، ئەگەر، سىز ئۇنىڭغا باش ئەگسىڭىز ئۇنىڭ ئارزۇسىنى بىر ئۆمۈر قاندۇرۇپ بولالمايسىز.
مۇبادا، سىز تېنىڭىزنىڭ يېمەك-ئىچمەك، ئۇيقا ۋە ئىشلەپ چارچىغاندىن كېيىن دەم ئېلىش تەلىپىنى قاندۇرمىسىڭىز، تېنىڭىز شۇ زاماتلا سىزنىڭ خاتا قىلغىنىڭىزنى بىلدۈرۈپ قويىدۇ. بىراق، ئەگەر، ۋاقتىڭىزنى زىيادە بىكار ئۆتكۈزۈۋەتسىڭىزمۇ، بۇ خاتالىقىڭىز كەلگۈسىڭىزدە ئايان بولىدۇ، ئۇ چاغدا سىزنىڭ ئىرادىڭىز ئاجىزلىشىپ، ئىشلەشتىن قاچىدىغان ھالغا كېلىپ بولغان بولىسىز.
دانىشمەن سوقرات چەكتىن ئېشىپ كەتكەن ھەرقانداق ئىشنى چۆرۈپ تاشلاشنى ئويلىغان. ئۇنىڭ يەپ-ئىچىشى پۈتۈنلەي ئاچلىقتىن قۇتۇلۇش ئۈچۈن، ھەرگىزمۇ يېمەك-ئىچمەككە بېرىلىش ھەۋىسىنى يېتىلدۈرۈش ئۈچۈن ئەمەس، ئۇنىڭ مۇرىتلىرىغا بولغان تەلىپىمۇ شۇنداق بولۇپ، تېخىمۇ كۆپ ۋاقتىنى قەلبىنى ئۆزگەرتىشكە سەرپ قىلغان.
سىز پۈتۈن كۈچىڭىز بىلەن ئۆزىڭىزنىڭ تېنىگە دىققەت قىلىڭ، ئۇنداق بولمىسا، ئۆز روھىڭىز تەرەققىي قىلغىنىدا، بالاپان بارار جايىغا كۈچلۈك قاناتلىرىنى قېقىپ ئەمەس، ئاجىزغىنا پۇتلىرى بىلەن تايتاڭلاپ ماڭغاندەك بولىدۇ.

3-ئاينىڭ 9-كۈنى

 

ئاچكۆزلۈك ۋە بايلىق

بايلار زور مىقداردا بايلىق توپلاپ، ئۇنى ئەڭ چوڭ نەتىجەم، دەپ قارايدۇ. بۇنى چۈشىنىشكە بولىدۇ، سەۋەبى، ئۇلار بۇنىڭ ئۈچۈن قۇربان قىلغانلىرى بەكمۇ كۆپ. بىراق، نامراتلارنىڭ بۇنىڭ ئۈچۈن بايلارنى ھۆرمەتلىشى غەلىتە ئىش. نامراتلار نېمە ئۈچۈن شۇنداق قىلىدۇ؟ نامراتلارنىڭ بايلارنى ھۆرمەت قىلىشى ۋە چوقۇنۇش سەۋەبى، نامراتلارنىڭ ئۆزىمۇ ئوخشاشلا نۇرغۇن بايلىققا ئېرىشىشنى ئىستەيدىغانلىقىدا.
ئەجەبا، خۇدا بەزى نەرسىلەرنى بۇ ئادەمگە بېرىدۇ-يۇ، باشقا بىرىگە بەرمەسمۇ؟ بىزنىڭ مەڭگۈلۈك ئاتىمىز ئۆزىنىڭ ھەرقانداق بىر بالىسىنى يەكلەپ باققانمۇ؟ ماڭا «زەبۇر»نىڭ قايسى يېرىدە ئاتىمىزنىڭ بىر كىمنى ئۇنتۇپ قالغىنىنى ئېيتىپ بېرەلەيسىز؟
−فرىچتېر روبېرت دې رامانې
ئادەم پۇل-دۇنياغا مەڭگۈ تويمايدۇ. سىز ئۇنىڭغا قانچە كۆپ ئېرىشكەنچە يەنە شۇنچە كۆپ تاپقۇڭىز، خۇمارىڭىزنى باسقۇڭىز كېلىدۇ. بايلىق ھەر قانچە كۆپ بولسىمۇ، تېخىمۇ بەك بېيىغۇسى كېلىدىغان ئادەمنى رازى قىلالمايدۇ.
غايەت زور مال-دۇنيانىڭ ھاراملىقى، باشقا تالاي بايلىقلارنى تۇتۇپ تۇرىدىغان ھارام ۋە گۇناھلارغا تۇتىشىپ كېتىدۇ.

3-ئاينىڭ 10-كۈنى

 

ئىشلەش ۋە بىكارچىلىق

ئۆزىڭىز قىلالايدىغان ئىشقا باشقىلارنى ئاۋارە قىلماڭ.
ئادەم تەبىئەت بىلەن كۈرەشمىسە، زاۋالغا يۈز تۇتىدۇ ۋە ھالاك بولىدۇ. مۇبادا، ئادەم ئۆز مەسئۇلىيىتىدىن قېچىپ، باشقىلارنىڭ ئادا قىلىشىنى كۈتسە، ئوخشاشلا ئۇنىڭ روھىمۇ زاۋالغا يۈز تۇتىدۇ ۋە ھالاك بولىدۇ.
بەزىلەر، جىسمانىي ئەمگەك ئەقلىي تۇرمۇشىڭىزدىن ئايرىپ قويىدۇ، دەپ قارىشىدۇ. بۇنىڭ دەل ئەكسىچە، جىسمانىي ئەمگەككە پۈتكۈل ۋۇجۇدىڭىز بىلەن كىرىشىپ كەتسىڭىزلا، ئاندىن ئەقلىي تۇرمۇش ھەم روھىي تۇرمۇشقا ئېرىشەلەيسىز.
سىزنىڭ بىر جۈپ قولىڭىز بىلەن ئىشلىشىڭىز، ئۆزىڭىزنى ئوراپ تۇرغان دۇنيانى تەتقىق قىلىشىڭىزدۇر. مەن ئۆزۈمنىڭ كۆكتاتلىقىدا گۈرجەك بىلەن يەرنى بوشۇتىۋاتقىنىمدا، ھەمىشەم شۇنداق ئويدا بولىمەن: «مەن نېمە ئۈچۈن ئۆز قولۇم بىلەن گۈرجەك ياساپ، ھازىرقىدەك ھوزۇرىنى سۈرمەيمەن؟» چۈنكى، گۈرجەك ياساشقىمۇ ساغلام تەن ۋە ئەقىل كېتىدۇ.
مەن ئۆزۈمنىڭ ئوتۇن يارغۇچىسى، بولكىچىسى ۋە ئاشپىزىم ئالدىدا نومۇس قىلىمەن، چۈنكى، ئۇلار ئۆزىنىڭ ھاجىتىدىن ئۆزلىرى تامامەن چىقالايدۇ، ئۇلار مېنىڭ ھېچقانداق ياردىمىمگە تايانماي كۈنلەپ، ھەتتا يىللاپ نورمال ياشىيالايدۇ. بىراق، مەن ئۇلارنىڭ ياردىمىسىز ياشىيالمايمەن.
−رالف ۋالدو ئېمېرسون

3-ئاينىڭ 11-كۈنى

 

ئاچچىقلىنىش ۋە ئۆچمەنلىك

ئۇ ئەگەر سىزنى خورلىسا، سىز يامانلىقتىن ياخشىلىق كۈتىدىغان ياكى  بۇزۇلغان ئادەم بولىسىز. بىراق سىز ئۇنىڭ ئۈچۈن، شۇنداقلا ئۆزىڭىز ئۈچۈن بۇنداق كىشىلەرگە مېھرىبانلىق كۆرسىتىشكە ھەقلىقسىز.
ئەقىللىق كىشى ھەممىنى ئۆزىدىن كۆرىدۇ، ھەم ئۆزىنى ئىزچىل ئۆزگەرتىپ تۇرىدۇ. دۆت كىشى ئەكسىچە، باشقىلاردىن ياخشىلىق كۈتىدۇ، باشقىلار ئۇلار ئويلىغاندەك قىلمىسا، ئۇلارغا خاپا بولىشىدۇ. ئەقىللىق ئادەم ھېچكىمدىن نارازى بولۇپ يۈرمەيدۇ.
بىز ھەمىشە باشقىلار قىلغان ياخشى ئىشلارغا دىققەت قىلماي قالىمىز. بۇ شۇنىڭ ئۈچۈنكى، بىز ئۇلارنى ياخشى كۆرۈپ كەتمەيمىز، بىراق بۇ بىزنىڭ سەۋەنلىكىمىز. بۇنداق تەرسا ھېسسىياتنى تىزگىنلەپ، ئۆزىڭىزنىڭ پوزىتىسىيىسىنى ئۆزگەرتىڭ، ئىمكان قەدەر ئۆزىڭىز ياقتۇرمايدىغان ئادەمنىڭ ئەڭ زور ئالاھىدىلىكىنى بايقاشقا ماھىر بۇلۇڭ.
ئاسمانغا تۆكۈرسەڭ يۈزۈڭگە چۈشىدۇ، خۇددى شۇنىڭدەك، يامانلىق قىلساڭ يامانلىق ئۆزۈڭگە قايتىدۇ.
−ھىندى ھېكمەتلىك سۆزلىرىدىن
3-ئاينىڭ 12-كۈنى


تەكەببۇرلۇق

تەكەببۇر ئادەم باشقىلارنىڭ ماختىشىنى تاما قىلىدۇ. ئۇ، ماختاشقا ئېرىشىش ئۈچۈن كىشىلەرنىڭ ھۆرمىتىگە ئېرىشىشكە توغرا كېلىدۇ. ھۆرمەت تېپىش ئۈچۈن ئۇ باشقىلارنىڭ ياخشى كۆرۈشىنى قولغا كەلتۈرۈشى زۆرۈر. كىشىلەرنىڭ ياخشى باھاسىنى قولغا كەلتۈرگەندىلا باشقىلار ئۇنى ياخشى كۆرىدۇ، ھۆرمەتلەيدۇ. شۇغىنىسى، كىشىلەرنىڭ تەكەببۇر ئادەمگە بېرىدىغان باھاسى ياخشى بولمايدۇ. شۇڭا، تەكەببۇر ئادەم مەڭگۈ ئۆزى كۆزلىگەن نەرسىسىگە ئېرىشىپ بولالمايدۇ.
تەكەببۇرلۇق دۆتلۈكتۇر. ئۇرۇق-جەمەتىنىڭ كېلىپ چىقىشى ياكى دۆلەت تەۋەلىكىدىن پەخىرلىنىش، تېخىمۇ دۆتلۈكتۇر.
بۇ دۇنيادىكى ئىپلاسلىق-رەزىللىكلەرنىڭ كۆپىنچىسى تەكەببۇرلۇقتىن كېلىدۇ. ئۇرۇق-قەبىلىلەرنىڭ ئۆز ئارا ئۇرۇش-تالاشلىرى ۋە دۆلەتلەر ئوتتۇرىسىدىكى ئۇرۇشلارمۇ تەكەببۇرلۇققا ئەگىشىپ پەيدا بولىدۇ.
تەكەببۇر ئادەم مۇز قاپ كىيىۋالغانغا ئوخشايدۇ. ھەرقانچە ياخشى، ئىللىق ھېس-تۇيغۇلارمۇ ئۇ مۇز قاپنى بۆسۈپ ئۆتەلمەيدۇ.

3-ئاينىڭ 13-كۈنى

 

شۆھرەتپەرەسلىك ۋە نام-ئاتاق

بىز يەر تەۋرىگەندىن كېيىن كان ئاستىدا قامىلىپ قالغان ئىشچىدەك ياشايمىز. سىز ئامالنىڭ بارىچە باشقىلارنىڭ سىزگە بەرگەن باھالىرىنى ئاڭلىمايدىغان بۇلۇڭ. مانا بۇ ھەقىقىي ياشاش.
ئادەم ئۈچۈن ئەمەس، خۇدا ئۈچۈن ياشاش، بۇ بەك تەستەكلا تۇيۇلىدىغان بىر ئىش. چۈنكى، سىز ئۆزىڭىزنىڭ ياخشى ياشىشى ئۈچۈن ھەقىقەتەن بىر خىل مۇكاپاتنىڭ بارلىقىنى بىلمەيسىز. ئەمەلىيەت دەل ئۇنىڭ ئەكسىچىدۇر. خۇدانىڭ روھى سىزنىڭ ئىچىڭىزنى ماكان تۇتقان، ئۇ سىزنى توختاۋسىز تارتۇقلاپ تۇرىدۇ، بۇ روھىي مۇكاپات سىزگە ھەرقانداق ئادەم بەرگەن ھەرقانداق مۇكاپاتتىن ياخشىدۇر.
خۇشامەتچى سىزگە تەخسىكەشلىك قىلىدۇ، چۈنكى ئۇ سىزنى كۆزگە ئىلمايدۇ. شۇ سەۋەبتىن سىز نېمە دەپ ئۇنىڭ خۇشامىتىنى ئاڭلايسىز؟ نېمە دەپ ئۇنىڭ ماختاپ-ئۇچۇرۇشلىرىنى رەت قىلىۋەتمەيسىز؟
باشقىلارنىڭ ئۆزى ھەققىدىكى قاراشلىرىغا زىيادە دىققەت قىلىپ كەتكەن ئادەم مەڭگۈ خاتىرجەملىككە ئېرىشەلمەيدۇ.

3-ئاينىڭ 14-كۈنى

 

سوتلاش ۋە جازالاش

سىزنى ئانىي تاپسا، ھاقارەتلەنسىڭىز قىساس ئالغۇڭىز كېلىدۇ، ئەمما بۇنىڭغا باھانە-سەۋەب ئىزدەيسىز، قەلبىڭىزنى يارا قىلغان شۇ كىشىنى ئۆزگەرتىمەن، دەيسىز.
بەزىلەر، زورلۇق ۋە تەھدىت بولمىسا سىزنى تىزگىنلەپ بولغىلى بولمايدۇ، دەپ قارىشىدۇ. ئۇلار كۆز توسقۇ تارتىپ قويۇلغان ئاتقا ئوخشايدۇ، شۇنداق بولغاندىلا ئۇلار ھارۋىنىڭ ئېغىرى بىلەن كارى يوق سۆرەۋېرىدۇ. جىنايەتكە قارشى تۇرۇش ئۈچۈن جازالاش ھەقلىق، دەپ قارايمىز. ئەمەلىيەتتە بىز بۇ ئارقىلىق تېخىمۇ كۆپ جىنايەتكە يول قويغان بولىمىز.
بىزنىڭ ھاياتىمىز ناسارالارنىڭ ھاياتىدىن كۆپ پەرقلىق. بىز بىر خىل ئېتىقادتىن بۇ نۇقتىنى ئېنىق كۆرۈپ يېتەلەيمىز: بالىلارنى تەربىيىلەشتە، جازالاش بىر خىل ئۈنۈملۈك ۋە پايدىلىق چارە، دەپ قارىۋالىمىز. خرىستىئان ئەقىدىسىدە، يامانلىق ئالدىدا ئەپۇچان، كەڭ قورساق بولۇش، يامانلىققا يامانلىق قىلماسلىقىمىز ۋاجىپ. ھالبۇكى، بىز بۇنى چاقچاق قىلىنىۋاتقاندەك يۈزەكى چۈشىنىۋېلىپ، داۋاملىق ئۇنىڭ ئەكسچە ئىش قىلىۋېرىمىز.
ھەر خىل جازانىڭ ھەممىسى شەپقەتسىزلىكتۇر. بۈگۈنكى جازا−تۈرمىمۇ نەچچە يۈز يىل بۇرۇنقى دەررە بىلەن ئۇرۇش ئۇسۇلىغا ئوخشاشلا شەپقەتسىزلىكتۇر.

3-ئاينىڭ 15-كۈنى

 

تىرىشچانلىق

جەمئىيەتنى ئۆزگەرتىشنىڭ بىردىن-بىر يولى، ھەممىمىز ئۆز-ئۆزىمىزنى ئۆزگەرتىپ تاكامۇللاشتۇرۇش. ئەگەر، شۇنداق قىلماقنى ئىستىسىڭىز، سىز بىر ئىشنى قىلىشىڭىز−قەلبىڭىزدىكى ئۆز-ئۆزىڭىزنى مۇكەممەللەشتۈرىشىڭىز كېرەك.
ھەر بىرىمىز مەنىۋى ياقتىن ئۆسۈپ يېتىلگەندە، بىزنىڭ ھاياتىمىز ياخشىلىنىشقا، بىزنىڭ يامانلىق-رەزىللىككە بولغان زەربىمىز ھەممىگە قابىل بولۇشقا باشلايدۇ.
تەربىيە كۆرگەن ئادەملەردىن ھاياتىمىزنى قانداق ئۆزگەرتىش خۇسۇسىدا پىكىرلىرىنى ئاڭلىساق، ئۇ بىزگە كۆپ رىغبەتلەندۈرۈش بولىدۇ. ئۇلارنىڭ جاۋابلىرىدا زور ئىختىلاپلار بولىدۇ، ھەتتا ئۇلار باشقىلارنىڭ ھاياتىنى ئۆزگەرتىش مۇمكىن ئەمەسلىكىنى بىلدۈرۈشىدۇ. بۇ دۇنيانى ئۆزگەرتىشنىڭ بىردىن-بىر يولى، سىزنىڭ مەنىۋى ئۆزلۈكىڭىزنى ئۆزگەرتىشكە ئىشىنىش.
جىسمانىي تۇرمۇشتا بىز شۈبھىسىز مەغلۇب بولدۇق، بىز ئۆلۈمگە مەھكۇم. بىز كۆزىمىز ۋە ئەقلىي ئىقتىدارىمىز ئارقىلىق بۇنى كۆرۈپ يەتكەنمىز. بۇ خۇدانىڭ مۇشۇ دۇنياغا ئاتا قىلغان قانۇنى. بۇ قانۇننى چۈشەنگۈچى ئۆزىنىڭ جىسمانىي تۇرمۇشى ئۈچۈن ئېلىپ بېرىۋاتقان كۈرىشىنى توختىتىدۇ، بەلكى ئۆزىنىڭ مەنىۋى تۇرمۇشىغا شۇڭغۇپ كىرىشى ئۈچۈن پۈتۈن كۈچى بىلەن تىرىشچانلىق كۆرسىتىدۇ.

3-ئاينىڭ 16-كۈنى

 

زوراۋانلىق ۋە ئۇرۇش

كىشىلەر، ئەدلىيە ئورۇنلىرىنىڭ قانۇن ۋە قائىدە-نىزاملىرىغا خۇدانىڭ قانۇنىدىنمۇ ئۆتە ھۆرمەت قىلىشىدۇ. ئەسلى بۇنداق بولماسلىقى كېرەك ئىدى، چۈنكى، بىر دۆلەت قانۇنى باشقا دۆلەتلەرنىڭ قانۇنى بىلەن ئوخشىمايدۇ، ئەمما خۇدانىڭ قانۇنى ھەرقانداق جاي ۋە ھەرقانداق ئادەم ئۈچۈن ئوخشاشتۇر.
ھۆكۈمەت ھەقىقىي ھوقۇق-ئىمتىيازلارغا ئىگە بولۇپلا قالماي يەنە بۇ ھوقۇق-ئىمتىيازلارنى قوغدايدىغان ساختا ئەقىدىلەرگىمۇ ئىگە.
زوراۋانلىقنى تۈگىتىشنىڭ بىردىن-بىر چارىسى، زوراۋانلىققا يېقىن يولىماسلىق.
قىلىچ، مىلتىقلار دەۋرىمىزنىڭ قورالىدۇر، ئۇ نەرسىلەر كەلگۈسىدە قەدىمكىلارنىڭ ھۈنەر سەنئىتى تەرىقىسىدە كۆرگەزمىخانىلارغا قويۇلىدۇ، خۇددى بىز بۈگۈنكى كۈنلۈكتە كۆرۈۋاتقان دىن بارلىق ئوتتۇرا ئەسىر قوراللىرى ئۈستىدىن كېسىم چىقارغاندەك.

3-ئاينىڭ 17-كۈنى

 

ئېتىقاد

بىراۋ، خرىستوستىن: «ھەقىقىي قانۇن قانداق بولىدۇ؟» دەپ سورىغانىكەن، خرىستوس جاۋابەن: «خۇدانى سۆيسەڭ، ھەقەمسايەڭنى سۆي» دەپتۇ. بۇددا ئەقىدىسىدىمۇ، كۇڭزى تەلىماتىدىمۇ شۇنداق دېيىلگەن.
ئاتا-ئانىلارنىڭ پەرزەنتلىرىنى بېقىپ چوڭ قىلىشى، بىزنىڭ بۈگۈنكىدەك كۈن كۆرۈشىمىز ئۈچۈندۇر. بىراق، بىز ئۆز پەرزەنتلىرىمىزنىڭ كەلگۈسى تۇرمۇشى ئۈچۈن ئۇلارنى تەربىيىلىشىمىز كېرەك، شۇندىلا بىز تېخىمۇ ياخشى ياشايمىز، بۇ دۇنيا تېخىمۇ گۈزەللىشىدۇ.
مېھرىبانلىقنى چۈشىنىش ئۈچۈن مېنىڭ ئۇنچىۋالا كۆپ زېھنىم كەتمەيدۇ. مەن ئۆزۈمنى شۇنداق سوراقلىيالايمەن: ئىش-ئەمەللىرىمنىڭ مەقسىتى بارچە ئادەملەرنىڭ ئومۇمىي قانۇنى ئىكەنلىكىنى ئېتىراپ قىلالامدىم؟
خۇدا بىزنىڭ كۆڭلىمىزگە ئېتىقاد ئاتا قىلدى، بىزگە ۋىجدان ۋە ئەقىل-ھوش بەردى. بىز تەھدىت ۋە قۇرال كۈچىگە تايىنىپلا باشقىلارنىڭ قەلبىدە ئېتىقاد تۇرغۇزالمايمىز. شۇڭا، بىز ئازغۇنلار ۋە ئېتىقادسىزلارنى ئەيپلىمەيلى، ئۇلارنىڭ خاتا يول تۇتۇشى ئۇلارنى زور بەختسىزلىككە مۇپتىلا قىلغاندۇر.

3-ئاينىڭ 18-كۈنى

 

ساختا ئىلىم

ئىلىم-پەننىڭ ئەڭ كۈچلۈك قوغدىغۇچىسىدا، ھەرقانداق كونكرېت پەنلەرنىڭ چوڭقۇر بىلىملىرى كەمچىلدۇر.
                             −گېئورگى.C. لېچتېنبېرگ
بۇرۇنقى ئۇلۇغ مۇتەپەككۇرلار شۇنىڭ ئۈچۈن ئۇلۇغكى، ئۇلارنىڭ ئىدىيىسىنى باشقىلار كىتابلىرىغا ئاددىي ھالدا تەكرارلاپ كۆچۈرۈپ قويغان ئىدىيە بولماستىن، بەلكى ئۇلار ئۆزلىرىنىڭ ئىدىيىسىنى ئەركىن-ئازادە ئىپادىلىگەندۇر.
−رالف ۋالدو ئېمېرسون
ئەمدىلىكتە، ئىلىم-پەن ئىگىلىگەن ئورۇن ئىككى-ئۈچ يۈز يىللار بۇرۇنقى دىنىي جەمئىيەت ئىگىلىگەن ئورۇن بولۇپ قالدى. ئۇ ھەر ئىككىلىسىدە يىغىلىشلار، قۇرۇلتايلار، ئەنجۈمەنلەر ئۆتكۈزۈلگەنىدى. ھەر ئىككىلىسىدە ئوخشاشلا تەنقىدىي تەپەككۇر ۋە ھالقىلىق ئۇقۇملار كەمچىل ئىدى، ھەتتاكى ئۇلارنىڭ ھەممىسى كەڭ ھەم مۆجىمەل ئىدى، ئۆزىگە بولغان ئىشەنچ ئىپتىخارلىقىغا چۆمۈلگەنىدى.
مۇبادا، ئۆزىڭىزنىڭ بىلىدىغىنىڭىزنىڭ بەكمۇ ئازلىقىنى بىلمەكچى بولسىڭىز، كۆپنى بىلىشىڭىزگە توغرا كېلىدۇ.

3-ئاينىڭ 19-كۈنى

 

تىرىشچانلىق

بىز، ئەسلى يامانلىق-رەزىللىكلەردىن قۇتۇلۇش ئۈچۈن ياشايمىز. سىز بۇنىڭغا قانچىكى تىرىشچانلىق كۆرسەتكەنچە سىز ئېرىشىدىغان ياخشىلىق-خەيرخاھلىقلار شۇنچە كۆپ بولىدۇ. شۇڭا، تىرىشچانلىق ئۆزىڭىزنى تېخىمۇ ياخشىلايدىغان، ئادەمگە پايدا ئېلىپ كېلىدىغان ئىشتۇر.
سۆيگۈ قۇدرىتىڭىزنىڭ تەرەققىياتىغا توسقۇنلۇق قىلىدىغان ھەر بىر توسالغۇلارغا يۈزلىنىڭ.
بىزنىڭ تېنىمىز بىر تۈرلۈك نەرسىگە، روھىمىز بولسا باشقا بىر تۈرلۈك نەرسىگە ئېھتىياجلىق بولىدۇ، بۇنداق ئەھۋال بەكمۇ ئومۇميۈزلۈكتۇر. بىزنىڭ تېنىمىز يېيىشكە ئېھتىياجلىق، بىراق، روھىمىز بولسا يېمىكلىكنى ئاچ قالغان ئادەمگە بېرىشكە ئېھتىياجلىق. سىز بۇلاردىن قايسىسىنى تاللايسىز؟
سىز ھەر بىر ئىشىڭىزدا دىققەت قىلىڭ، ئۆز دىققىتىڭىزنى قىلچە قىممەتسىز دەپ قاراپ قالماڭ.
−كۇڭزى
باشقىلار ئۈچۈن ياخشى ئىش قىلغىنىمىزدا، بىزنىڭ تۇيغۇمىز ھامان تولىمۇ ياخشى بولىدۇ. مۇبادا، بىز باشقىلار ئۈچۈن ياشايدىغان بولساق، دۇنيادىكى ھەممە ئادەملەر بىزنىڭ يېقىن دوستىمىزغا ئايلىنىدۇ.

3-ئاينىڭ 20-كۈنى

 

ئۆزىنى قۇربان قىلىش

ئۆلۈمگە يۈز تۇتقان بەدەندىن ئۆزىنى كۆرەلمىگەن ئادەم، بىر ئۆمۈرلۈك ھەسسىلەپ پاراسەتكە ئېرىشۇر.
−بۇددىزم ماقالى
سىز خالىغان تەقدىردىمۇ، ئۆزىڭىزنى ئىنسان تەبىئىتىدىن ئايرىۋېتەلمەيسىز. سىز ئۇنىڭ ئىچىدە ياشايسىز، ئۇنىڭ بىلەن بىللە مەۋجۇت بولۇپ تۇرىسىز. بىز بىر-بىرىمىزنى ھەرىكەتلەندۈرۈش، بىر-بىرىمىز بىلەن ئارىلىشىش ئۈچۈن يارالغان، بىراق، ئۆز-ئۆزىمىزدىن ۋاز كەچمىسەك، ھەرگىزمۇ ئۇنداق قىلغىلى بولمايدۇ.
−ماركۇز ئورېلىيۇ
ئۆز ئابرۇيىنى زىيادە ئاياپ كېتىش، روھىي جەھەتتە بىر خىل كېسەللىككە ئېلىپ بارىدۇ. ئۇنىڭ ئەڭ كۆرۈنەرلىك ئىپادىسى،«مەنمەنچى» ئاتىلىدىغان بىر خىل پسىخىك كېسەللىك پەيدا قىلىدىغىنىدا.
باشقىلارنى ئۆزىڭىز ئۈچۈن ياشىسۇن دېسىڭىز، ئۇلارنىڭ ئۆزىنى سۆيۈشىدىن سىزنى سۆيۈشى ئېشىپ كەتسە قانداق قىلغۇلۇق؟ بۇ ئارزۇيىڭىزنى روياپقا چىقىرىشنىڭ بىردىن-بىر ئامالى شۇكى، ھەر بىر ئادەم پۈتكۈل ئىنسانىيەتكە بەخت يارىتىش ئۈچۈن باشقىلارنى كۆزلەپ، ھەممە كىشىنى سۆيۈپ ياشىشى كېرەك. شۇنداق قىلغاندىلا ئاندىن بارچە كىشى سىزنى سۆيىدۇ، سىز شۇندىلا ئۆزىڭىز تەلپۈنگەن ھاياتقا ئېرىشەلەيسىز.

3-ئاينىڭ 21-كۈنى

 

تىرىشچانلىق
ھەممىگە ئايانكى، تىرىشچانلىق بولمىسا ھېچ ئىشنى ۋۇجۇتقا چىقارغىلى بولمايدۇ. بۇ، ھاياتنىڭ ئاساسىي نىشانىغىمۇ، سىزنىڭ مەنىۋى تۇرمۇشىڭىزنىڭ ئاساسىي نىشانىغىمۇ ماس كېلىدۇ. تىرىشچانلىقىڭىز بولمىسا، سىزنىڭ روھىڭىز ھېچنەرسىگە ئېرىشەلمەيدۇ.
ئۆزىدىن قانائەت تاپماسلىق، ئىچكى دۇنياسىنى مۇكەممەللەشتۈرۈشكە تەلپۈنۈش، مانا بۇ سىزنىڭ ئەقەللىي تۇرمۇشىڭىزدا ھازىرلاشقا تېگىشلىك زۆرۈر شەرتلەردۇر. مۇشۇ شەرتلەر ھازىرلانغاندىلا، ئاندىن ئۆزىڭىزنى تاكامۇللاشتۇرالايسىز.
تومۇز يازنىڭ ئىنتايىن پىژ-پىژ بىر كۈنىدىن كېيىن يامغۇر ياغسا، ئادەمگە ئاجايىپ ھۇزۇر بەخش ئېتىدۇ، ئادەمنىڭ روھىنى كۆتىرىدۇ. خۇددى شۇنىڭدەك، ئۆزلۈك مەدھىيىلىرىنىڭ ئوتتەك قىزىق، يالقۇنجاپ تۇرغان قۇياشىدىن كېيىنكى كەمتەرلىك بىلەن قىلىنغان ئىش-ھەرىكەتلەرمۇ يېڭى روھ ئاتا قىلىدۇ.
سىز ئۆزىڭىزنىڭ ئىش-ھەرىكىتىنى باشقىلارنىڭ ئىش-ھەرىكىتى بىلەن ھەر قېتىم سېلىشتۇرۇپ كۆرگىنىڭىزدە، ئۆز-ئۆزىڭىزنى مۇكەممەللەشتۈرۈش يولىدىكى ئېزىقتۇرۇلۇشلارنىڭ ئالدىنى ئالالايسىز.

3-ئاينىڭ 22-كۈنى


ھەقىقەت

بىر ئېغىز راست گەپ دۇنيادىكى بارچە بايلىقلاردىنمۇ قىممەتلىكتۇر.
يالغان گەپ كىشىنى قانچىلىك مەپتۇن قىلىشىدىن قەتئىي نەزەر، يالغان ئېيتقۇچىنى ئازابلىغىنى ئازابلىغان. بىراۋ ئىمكانقەدەر بالدۇرراق ئۆزىنىڭ يالغانچىلىقىنى تاشلىسا، راست سۆزلىرى ئارقىلىق ئۆزىنى قۇتقۇزالايدۇ.
سىز باشقىلارنىڭ ئەتراپىدا ياشاۋاتقىنىڭىزدا، بالىلىق مەزگىلىڭىزدىكى يالغانچىلىق ۋە خاتا قاراشلاردىن ئۆزىڭىزنى خالاس قىلماق بەسى مۈشكۈلدەك، ئەتراپىڭىزدىكى كىشىلەردىن قۇتۇلماق بەك تەستەك بىلىنىدۇ. سىز يالغۇز ياشىغىنىڭىزدىلا ئاندىن شۇنداق قىلالايسىز. تىكەندەك يالغۇز ۋاقتىڭىزدا، سىز ھۆكۈم قىلالمىغان ھەر بىر ئىدىيە ۋە تەلىملەرگە شۈبھە بىلەن قارىشىڭىز زۆرۈر.
مۇبادا، ئۆز مەنپەئەتىڭىز ئۈچۈنلا ھەقىقەتكە تىكىلىشتىن قورقسىڭىز، سىز مەڭگۈ ئۆزىڭىزنىڭ شارائىتىنى ئۆزگەرتەلمەيسىز، بەلكى ئۇنى تېخىمۇ ناچارلاشتۇرۇپ قويىسىز.

3-ئاينىڭ 23-كۈنى

 


سۆز ۋە ھەرىكەت

سىز بۇ يەردە يامان گەپ قىلسىڭىز، ئۇ يەردە ئەسكى ئىش قىلىسىز. سىز گاھىدا، ئۆزىڭىزنىڭ سۆز-ھەرىكىتىگە دىققەت قىلماي قالىسىز، ئۇ سۆز-ھەرىكەت مەيلى ياخشى ياكى يامان بولسۇن. بىز سۆز-ھەرىكىتىمىزنىڭ چىرايلىق بولۇشىنى ئارزۇلىساق، سۆيگۈ دەرىخىنىڭ ئۆسۈپ يېتىلىشىگە تۈرتكە بولىدۇ.
سۆز-ھەرىكەتتە يەتتە ئۆلچەپ بىر كەسكۈلۈك. رېئايە قىلىشقا تېگىشلىك بۇ تەرتىپ ئىنتايىن مۇھىم.
كىچىككىنە ياخشى ئىش-ئەمەللەرنىڭمۇ سىزنىڭ مەنىۋى قىياپىتىڭىزنى يارىتىشقا ياردىمى تېگىدۇ، شۇڭا، ھاياتتا ياخشى ئىشنىڭ چوڭ-كىچىكى بولمايدۇ. كىچىككىنە، ئانچە مۇھىم بولمىغان ۋە ئۇششاق-چۈششەك ئىشلار بىر پۈتۈن ھاياتنى تەشكىل قىلىدۇ.
قانداقتۇر نەرسىلەرگە ئېرىشىش ئۈچۈن تىرىشىشىڭىز كېرەك. ئەڭ قىيىن شۇنداقلا ئەڭ مۇھىم بولغان تىرىشچانلىق سۈكۈتنى ساقلاپ قېلىشتۇر.
كۆپ ئاڭلاپ، ئاز سۆزلەڭ.
−سوفىزم ھېكمەتلىك سۆزلىرىدىن

3-ئاينىڭ 24-كۈنى

 

سوتلاش ۋە جازالاش

باشقىلارغا باھا بەرمەڭ. مۇبادا، بىراۋ سىزگە باھا بەرسە، سىز يامان گەپ قىلسىڭىز، ئۇنىڭدىن ئۆچ ئالغاندەك بولۇپ قالىدۇ.
ئىنسانلارنىڭ ئەڭ دەسلەپكى ياشاش نىشانى، ئىلاھىي روھ بىلەن ھەمنەپەس بولۇش. گەپ-سۆزلەر بىزنىڭ نىشانىمىزنى روياپقا چىقىرىشتا ياردىمى بولغان قورالدۇر. گەپ-سۆزلەرنى خاتا ئىشلىتىپ قويۇشتىن پەخەس بۇلۇڭ ھەمدە ھەر خىل گەپ-سۆزلەرگە−ئۆزىڭىزنىڭ ۋە ئۆزگىلەرنىڭ ھۆكۈمى، كىتابى، يازما ياكى ئاغزاكى گەپ-سۆزلىرىگە ھۆرمەت قىلىڭ. ئادەمدە غەيرى نىيەت، غەيرى مەقسەت پەيدا قىلىدىغان گەپ-سۆزلەرنى ئىشلىتىپ قېلىشتىن ساقلىنىپ، ئادەمنى بىردەك ئۆم-ئىناق قىلىدىغان گەپ-سۆزلەرنى ئىشلىتىڭ.
ئۆزىڭىزنى باشقىلارنىڭ ئورنىغا قويۇپ باقماي تۇرۇپ ھەقەمسايىڭىزنى ئەيىبلىمەڭ.
ھەر بىر جىنايەتكار كىشى ۋىجداننىڭ جازاسىغا ئۇچرايدۇ. ناۋادا، ئۇ ئىچىدىن ئازابلانمىسا، باشقىلارنىڭ سىرتىدىن تەن جازاسى بېرىشىمۇ نەتىجە بەرمەيدۇ، بەلكى بۇ ئىش ئۇنىڭ تېخىمۇ ئاچچىقىنى قوزغايدۇ.

3-ئاينىڭ 25-كۈنى

 

ئىدىيە

كۆپىنچە يامان ئىش-ھەرىكەتلەر يامانلىق قىلغۇچىنىڭ ئەسكىلىكىدىن بولمايدۇ، بەلكى ئۇلار باشقىلار ئىپادىلىگەن ئىدىيىنىڭ قەبىھلىكىگە ئىشەنگىنىدىن بولىدۇ. بىز ھەرگىزمۇ باشقىلارنىڭ ھەممە ئىدىيىسى توغرا دەپ قارىۋالماسلىقىمىز كېرەك.
بىزنىڭ كۈچ-قۇدرىتىمىز ئىدىيىمىزدە. ناۋادا، بىز بۇنىڭغا ئىشەنسەك ھەمدە بۇ نۇقتىنى ئېسىمىزدە چىڭ ساقلىساق، تالاي رەزىللىك-ئىپلاسلىقلار يوقۇلۇپ، بۇ دۇنيا مېھرىبانلىق بىلەن تولىدۇ.
ھېسسىيات پەيدا بولغاندا، ئادەمنىڭ ئىرادىسىگە بېقىنمايدۇ. بىراق، ئىدىيە ئاشۇنداق ھېسسىياتنى يا قوبۇل قىلىدۇ ياكى سىقىپ چىقىرىدۇ. شۇڭا، بىزنىڭ ئىدىيىمىز ھەرقانداق ئىشنىڭ ئاساسى.
بىزنىڭ ئىدىيىمىز مېھمىنىمىزغا ئوخشايدۇ. ئۆيگە كەلگەن مېھماننى مەيلى ئۇ ياخشى ياكى يامان ئادەم بولسۇن، دەرىجىسىگە قاراپلا ئەيىبلىسەك بولمايدۇ، ئەمما، بىزنىڭ يامان ئىدىيىنى چۆرۈۋېتىپ، ياخشى ئىدىيىنى ساقلاپ قېلىشقا يەتكۈدەك دەرمانىمىز بار.

3-ئاينىڭ 26-كۈنى

 

دۇنيادا گۇناھ يوق

ئادەملەر ئۆز بېشىغا كەلگەن بەختسىزلىكتىن قېچىپ قۇتۇلماقچى بولۇشىدۇ-يۇ، ئۆزى پەيدا قىلىپ قويغان بەختسىزلىكىدىن قېچىپ قۇتۇلالمايدۇ.
ھەر بىر ئادەمنىڭ تۇرمۇشىدا ئۆزىگە چۇشلۇق قىيىنچىلىق بولىدۇ، بىز شۈكرى قىلىپ ياشىساقلا تۇرمۇشنىڭ ئېغىرى بىلىنمەيدۇ. بىز يولۇققان قىيىنچىلىقمىز بىزنىڭ بار كۈچ بىلەن ئۇنى يېڭىپ تاۋلىنىشىمىز ئۈچۈندۇر.
مۇبادا، سىز بىتاب بولۇپ قالسىڭىز، سەۋر قىلىڭ؛ ناۋادا سىزگە باھا بېرىشسە، ياخشى جاۋاب قايتۇرۇشىڭىز كېرەك. ئەگەر، سىز ئار-نومۇسقا قالسىڭىز ئۇنداقتا كىچىك پېئىل بۇلۇڭ. مۇبادا، ئۆلۈم يېقىنلاشسا، مىننەتدارلىق بىلەن قوبۇل قىلىڭ.
بارچە ھەقىقىي ئۇلۇغۋار ئىشلار ئازاب-ئوقۇبەت ئارقىلىق مەيدانغا كېلىدۇ.
ئەسكى مىجەز شۇنىڭ ئۈچۈن زىيانلىقكى، ئۇ سىزگە زىيان سېلىپلا قالماي، بەلكى ئۇ ئىللەت باشقىلارغا يۇقىدۇ. ناۋادا، سىزنىڭ كەيپىڭىز چاغ بولمىسا، بىر مەزگىل يەككە-يېگانە ياشاپ بېقىڭ، كەيپىڭىز ياخشىلانغاندا ئاندىن باشقىلار بىلەن ئارىلاشسىڭىز بولىدۇ.

3-ئاينىڭ 27-كۈنى

 


ھازىردا ياشاش

سىز خۇدانىڭ ھەر قۇتلۇق كۈنى ئورنىڭىزدىن تۇرغىنىڭىزدا، ئۆز-ئۆزىڭىزدىن: «مەن بۈگۈن قانداق ياخشى ئىشلارنى قىلالىشىم مۇمكىن؟» دەپ سوراڭ.
بىراۋ ئۇرۇقنى تۇپراققا كۆمۈپ، ئۇرۇقنىڭ قاچان ئۈنۈپ چىقىشىدىن خاۋاتىرلىنىپ قالسا، ئۇرۇقنى ئېچىپ تىنماي كۆرۈپ باقىدۇ. شۇنداق قىلىپ، ئۇ كىشى ئۇرۇققا زىيان سېلىپ قويىدۇ-دە، ئۇرۇقنى مېۋە بەرگۈزمەيدۇ. خۇددى شۇنىڭدەك، سىز توختاۋسىز ئىشلەۋېرىڭ، ئارقىڭىزغا قارىماڭ، ۋاقتى-سائىتى كەلگەندە، سىزنىڭ مېھنەتلىرىڭىز ھامان مېۋە بېرىدۇ.
ھاياتتا چەكسىز ۋاقىت يوق، بارى پەقەت كۆز ئالدىڭىزدىكى ئۆتكۈنچى لەھزىلەرلا خالاس، بىزنىڭ پۈتكۈل ھاياتىمىز مانا شۇ لەھزىلەردە خوراپ تۈگەيدۇ. شۇڭا، سىز بارلىق تىرىشچانلىقىڭىزنى مۇشۇ كۆز ئالدىڭىزدىكى لەھزىلەرگە مەركەزلەشتۈرۈڭ.
بىز ئۆزىمىز ئۆلگەندىن كېيىن ھاياتنى تەسەۋۋۇر قىلالمايمىز، شۇنداقلا تۇغۇلۇشتىن ئاۋۋالقى ھاياتنىمۇ كۆز ئالدىمىزغا كەلتۈرەلمەيمىز، چۈنكى، بىزنىڭ تەسەۋۋۇرىمىز ۋاقىت-زامان ئۇقۇمىدىن ھالقىپ كېتەلمەيدۇ. شۇنداقتىمۇ، بىزنىڭ ھەقىقىي ھاياتىمىز ۋاقىت-زامان سىرتىدا بولىدۇ.

3-ئاينىڭ 28-كۈنى

 

ئۆلۈم

مەڭگۈلۈككە ئېرىشكۈچى ھايات خۇسۇسىدا پىكىر يۈرگۈزەلمەيدۇ، دەپ قالماڭ. ئەگەر، بىر ئادەم جىسمانەن مەۋجۇدىيەتلا بولىدىكەن، ئۇنىڭ ئۆلۈمى بەكمۇ ئېچىنىشلىق بولىدۇ. مۇبادا، بىراۋ روھىي مەۋجۇدىيەتلا بولۇپ، ئۆز تېنىدە ۋاقىتلىق ئولتۇراقلاشقان بولسا، ئۆلۈم ئۇ ئۆز بېشىدىن كەچۈرگەن بىر قېتىملىق بۇرۇلۇشلا بولۇپ قالىدۇ، خالاس.
ئۆلۈمنى ئەستە تۇتۇڭ، بۇ ھەرگىزمۇ ياشاۋاتقىنىڭىزدا بىر ئۆمۈر قەلبىڭىزدە ئۆلۈمنى ياد ئېتىڭ، دېگەنلىك ئەمەس، بەلكى ئۆلۈم يېتىپ كەلگەندە، خۇشاللىق بىلەن ھازىرلىنىڭ دېگەنلىك.
ھايۋانلار ياشىسىمۇ ئۆزىنىڭ ئۆلىدىغىنىنى بىلمەيدۇ. شۇڭا ئۆلۈمدىن قورقمايدۇ. شۇنداق ئىكەن، ئادەم نېمە ئۈچۈن ئۆزىنىڭ ئۆلۈمىنى كۆز ئالدىغا كەلتۈرىدۇ ھەم ئۇنىڭدىن قورقىدۇ؟ ئەقىللىق ئادەم ئۆزىنىڭ ھاياتىنى جىسمانىي ئۆزلۈكتىن مەنىۋى ئۆزلۈككە ئايلاندۇرىدۇ. شۇنداق قىلغاندىلا، گەرچە ئۆلۈم ۋەھىمىسىدىن قۇتۇلۇپ كەتكىلى بولمىسىمۇ، سىزنى خۇددى مۇساپىر ئۇزاق سەپەردىن كېيىن مېھرلىك ئانا يۇرتىغا قايتىپ كەلگەندەك ھۇزۇرلاندۇرىدۇ.

3-ئاينىڭ 29-كۈنى

 

ھەقىقەت / ئۆلگەندىن كېيىن

سىز ھەمىشە ھەقىقەتكە ئېرىشەلەيسىز. ھەقىقەت خۇددى قۇياش نۇرىدىكى كۆلەڭگۈڭىزگە ئوخشاش باشتىن ئاخىر سىزگە ئەگىشىدۇ.
ساختا ئەقىدىلەر سىزگە شۇنى بىلدۈرۈپ قويىدۇ: بۇ دۇنيا رەزىللىك بىلەن تولغان، ئۇ دۇنياغا بارغاندىلا ئىزگۈلۈكنى ئەمەلدە كۆرسىتىش مۇمكىن. بىراق، ھەقىقەت شۇنداق ئېيتىدۇ: بۇ دۇنيادا ياشاشنىڭ مەقسىتى ئىزگۈ-گۈزەللىك ئۈچۈندۇر، مۇشۇ ماكان-مۇشۇ زاماندىلا ئىزگۈ-گۈزەللىكنى ئەمەلدە كۆرسەتكىلى بولىدۇ.
ھاياتىڭىزنى گۈزەللەشتۈرۈش ئۈچۈن ئەتراپىڭىزدىكى ھەممە نەرسە گۈزەل-ياخشى بولۇشى شەرت، دەپ تۇرۇۋالماڭ. سىز خۇدانىڭ قانۇنىغا بىنائەن ياشاشقا تىرىشىشىڭىز كېرەك، شۇنداق بولغاندىلا سىزنىڭ ھاياتىڭىز گۈزەللىشىدۇ.
ئەگەر، سىزنىڭ قەلبىڭىزدە بېھىش-جەننەت بولمىسا، سىز جەننەتكە كىرەلمەيسىز.
ھايات بىلەن ئۆلۈم ئىككى ساھە. ئۇلارنىڭ ئارقىسىدا ئوخشاش نەرسە مەۋجۇت، ئۇنىڭ زادى نېمە نەرسىلىكى ماڭىمۇ قاراڭغۇ. شۇڭا، «يوقلۇق» مەۋجۇت بولماستىن، بەلكى «بارلىق» مەۋجۇتتۇر.

3-ئاينىڭ 30-كۈنى

 

سۆيگۈ-مۇھەببەت

خۇشاللىقنى قوغلاشقاندىن كۆرە، ئۆزىڭىز قىلىۋاتقان ئىشلىرىڭىزدىن بايقىغىنىڭىز تۈزۈك.
−يوھان رۇسكىن
ھاياتتا سۆيگۈ-مۇھەببەت بولمايدىكەن، ياشاشنىڭ پايدىسى بولمايدۇ. گۇناھ ۋە ئېزىقىشنى توسقاندىلا روھنى ماكان تۇتقان مۇقەددەس سۆيگۈگە ئىتائەت قىلىمىز، كىشىلەر شۇندىلا شاد-خۇراملىقنىڭ ئىنئامىغا نائىل بولالايدۇ.
بىزنىڭ ھاياتىمىز ئۆزلۈكسىز تاكامۇللۇققا قاراپ ئىلگىرىلەيدۇ.
سۆيگۈ-مۇھەببەت مېھرىبانلىقتىن پەيدا بولىدۇ. بىز ھەممىمىز مانا شۇنداق سۆيگۈ-مۇھەببەتنى چۈشىنىمىز، ئۇنىڭدىن باشقىچىرەك سۆيگۈ-مۇھەببەتنى چۈشەنمەيمىز. بىراق، سۆيگۈ-مۇھەببەت ئېغىزدىلا ئەمەس، بەلكى باشقىلار ئۈچۈن قىلىۋاتقان ئىشمىز−ئەمەلىيىتىمىزدە كۆرۈلىدۇ.
ئاشۇ كىچىككىنە، ئەرزىمەس ھەم مۇھىم بولمىغان «ئۆزىڭىز»نى ئۇنتۇپ، ئۆزىڭىزگىلا ياخشى بولۇشنى ئويلىماڭ. باشقىلارنى يەنە ئارتۇقچە ئەيىبلەپ يۈرمەڭ، كۆرەلمەسلىك-ئىچى تارلىقلارنى قىلماڭ، ئەسكى ئىشلارنى قىلماڭ، شۇندىلا ئۆز قەلبىڭىزدىكى خۇدانىڭ ئويغىنىپ، قەلبىڭىزدە پارلاق نۇر چېچىشقا باشلىغانلىقىنى تۇيىسىز.

3-ئاينىڭ 31-كۈنى

https://www.uyghur-archive.com/okyaneser/mexsus_7.html